Tevî li navçeya Çemçemal a Silêmaniyê, topa malan tê hilberîn û di warê gazê de dewlimende, lê şêniyên wê ev hefteyeke nikarin betlek top bi dest bixin û diyar dikin ku ji ber nebûna topê, bidaran xwarina xwe çêdikin. Serokê Meclîsa Parêzgeha Silêmaniyê sedema kêmbûna topê ji aliyê welatiyan ve zêde bikaranîna wê dibîne.
Ev demeke weke bajarên din ên Herêma Kurdistanê li navçeya Çemçemal a Silêmaniyê jî pirsgirêka kêmbûna topa malan heye. Lê rojane li heman navçeyê ji aliyê Kargeha Kormor re hezar tom topa malan tê hilberîn. Lê niha welatiyên navçeyê bê top in û nêzî hefteyekê ye li benda betlek topa malane.
Welatiyê Çemçemalê Serdan Ezîz got: “Ev demeke mîna krîzên din, krîza topa malan jî ji bo welatiyan derketiye. Lê Çemçemal xwedî kargeha herî mezin a hilberîna gaza xwezayî ye. Me li niha taxê betlên xwe yên vala anîne li ber derî. Ev du roje topa me xelas bûye. Sibehê zû ve me peywendî bi topfiroş dikin, lê bersiva me nade. Eger betla topa me ji bo tîjekirinê bibin, divê çend rojan li bendê bimînin heta tînin. Li ber nebûna topa malan welatiyan serî li şewitandina daran daye. Eger ceyran hebe, hîterê bi kar tînin.”
Ev çend roj in li Herêma Kurdistanê pirsgirêka kêmbûna topa malan derketiye ku yek ji pêwîstiyên sereke yên welatiyane. Lê, hikûmeta Herêma Kurdistanê ji bo çareserkirinê xemsare û vê yekê ji bo welatiyên Herêma Kurdistanê bargiraniyek zêde çêkiriye.
Welatiya Çemçemal Nazdar Kerîm got: “Ev 4-5 roj in em li benda betlek top in. Ji ber nebûna topê, em nikarin bi tenorê nanî çêbikin. Neçar in nan bikirîn. Ji bo germkirin û xwarinê jî agiriyê supeyê bi kar tînin.”
Serokê Meclîa Parêzgeha Silêmaniyê Azad Hememîn red kir ku hilberîn û parvekirina topa malan kêm kirîne û got: “Agahiya me ji krîza topa malan heye. Hilberîna wê kêm nebûye. Li Silêmaniyê weke berê tê hilberîn ku 240 tone. Lê rêjeya wê weke xwesteka welatiyan nîne. Ji ber sedema kêmbûna neftê, xwesteka li ser bikaranîna topê zêde bûye. Ji ber zêdebikaranînê pirsgirêk derketiye.”
Azad Hememîn diyar kir ku Wezareta Çavkaniyên Xwezayî soz daye di nava vê mehê de ji bo Silêmaniyê topa malan zêde bike û got: “Rojane hezar ton top li Kargeha Kormor tê hilberîn. Ji vê 700 tonan didin Herêma Kurdistanê û 300 tonan ji derveyî Herêma Kurdistanê diroş in. Em dixwazin ya Silêmaniyê zêde bikin. “
Li navçeya Çemçemal 6 kargehên tîjekirina betlên topên malan heye. 5 kargehan destûra fermî ya hikûmeta Herêma Kurdistanê heye û ser bi parêzgeha Silêmaniyê ne. Ya din jî destûra hikûmeta Iraqê heye û ser bi parêzgeha Kerkûkê ye.
(ab)
