MIHEMED CIBURÎ / BERXDA
Ji ber bendavên ku Tirkiye li ser rûbarên Dicle û Firatê çêdike, Iraq roj bi roj berbi çolbûnê ve diçe û tê pêşbînîkirin ku piştî 20 salên din li Iraqê krîza avê derkeve.
Li Iraqê rêjeya hişkbûna xakê û çolistan zêde bûye. Li gorî pisprên avhewa û jîngehê sedem kêmbarîna baranê û kêmbûna ava Dicle û Firatê ye.
Pisporê Avhewayê Sediq Etiye li ser mijarê ji Rojnews’ê re axivî û got: “Li Iraqê rêjeya çolistanê gihîştiye ji sedê 70’î ku dibe ku zêdetir bibe û di sala 2040’an de ji Iraqê re krîza avê derketeve û rûbar berbi zûhabûnê ve diçe. Divê hikûmeta Iraqê planek stratejîk ji bo çareserkirina krîza zûhabûna rûbar û golan hebe. Eger planek nîştimanî ji bo daristanan nebe, wê Iraq di havînê de bibe jîngehek tozî û germ.”
Li gorî daneyên Neteweyên Yekbûyî (NY), di encama guhertinên avhewayê de ku li ser asta cîhanê û Iraqê rû daye, salene Iraq nêzîkî 100 hezar donim zeviyên çandiniyê ji dest dide.,
Asta rûbarê Firatê ku ji Tirkiyeyê diherike Sûriye û Iraqê kêm bûye. Kêmbûna ava Firatê metirsî li ser jiyana welatiyên Sûriye û Iraqê di warê av û avdaniyê de çêkiriye.
‘Destdirêjiya li dijî Iraqê bi riya şerê avê ye’
Pisporê Stratejiyê Elî Mehdî got: “Berdewam li ser rûbarên Dicle û Firatê çêkirina rûbaran, gefê li Iraqê dike. Mijara çolbûnê bûye pirsgirêk aloz û helwesta hikûmetê jî nezelale”
Elî Mehdî li ser mijarê hikûmeta Iraqê xemsar dibîne û wiha domand “Hikûmeta Iraqê berdetekek ji bo çareserkiirna krîzan nîne. Destdirêjiya li dijî Iraqê bi riya şerê avê ye. Pêwîstî bi bertekek cidî ya hikûmetê heye ku di asta van metirsiyan de be ku bi taybet wekhevê destdirêjiyên leşkerî yên li dijî Iraqê ne.”
(ab)
