Serokê Beşa Şaristanî li Zanîngeha Komar Ako Reşîd, diyarkir ji ber rêgiriyên welatên cîran (Tirkiye, Îran) ji sedî 80’yê ava Herêmê kêm bûye. Ako got, avên binerd jî bi rêjeyek berbiçav kêmbûye û diyarkir ger berê bîrek avê di 200 metran de derdiket, niha di 750 metran de av derdikeve.
Derbarê qutkrina avê ji aliyê Tirkiye û Îranê ve li ser Herêma Kurdistan û Iraqê her wiha metirsiyên wê, Serokê Beşa Şaristanî li Zanîngeha Komar Ako Reşîd ji Rojnews re axivî.
Ako Reşîd got, “Sedemê sereke yê kêmbûna avê li Iraq û Herêma Kurdistanê, çêkirina bendavan a ji aliyê welatên cîran ve ye ku li ser çavkaniyên ava Iraqê çêdikin. Ji berku ji sedî 70’yê çavkaniyên me yên avê ji derve de tê. Sedemek din qirêjbûna jîngehê û xirab bikaranîna avê ye.”
Derbarê bandorên ku rêgiriya avê bi xwere anîne jî Ako Reşîd wiha axivî; “Ji ber girtina avê ji aliyê welatên cîran ve, nêzî ji sedî 80’yê ava Herêma Kurdistanê kêm kiriye. Avên binerd jî bi rêjeyek berbiçav kêmbûye. Ger berê bîrek di 200 metran de av derdiket, niha di 750 metran de av derdikeve.”
(kş)
