Şelaleya Dola Şehîdan li sinorê bajaroka Sengeser a ser bi îdareya Raperîne. Xwezaya wêya sihrawî û ciwaniya wê xemlek ciwan daye Bihara deverê. Xweşiktiya wê bala geştiyaran dikêşe ser xwe. Welatiyên deverê jî rojên xwe yên taybet li ber şelaleyê pîroz dikin.
Şelaleya Dola Şehîdan dikeve gundê Qadirawa ya ser bi Sengeserê. Ev şelale ji ava coyên çandiniyê pêktê, salane divê demsalê de ji ber ava coyan ev şelale çêdibe.
Geştiyar jî ji bo derbaskirina demek xweş serdana vê şelaleyê dikin û wêneyên xwe li ber digrin. Her wiha welatî rexne li hikûmetê dikin ku giringî bi xweza û cihên geştiyarî nade.
Serhed Xalid xelkê deverê ye û ji bo derbaskirina demek xweş serdana şelaya Dola Şehîdan kiriye. Serhed da zanîn devera Piştder bi giştî xwediyê xwezayek ciwan û geştiyariyê ye. Serhed got, Şelala Dola Şehîdan jî yek ji cihên xweş ên deverê ye ku bala geştiyaran dikêşe ser xwe.
Her wiha da zanîn di dema serdana geştiyaran de qerebalixiyek zêde çêdibe û bi qasî pêwîst rênmayên paqijiya xwezayê li berçav nagirin. Serhed got rêya hatina şelaleyê xirabe û hikûmet bi qasî pêwîst giringî bi cihên geştiyarî nade.
Geştiyarê bi navê Bawer Ferîdûn jî got: “Me cihên xweş ên geştiyariyê hene. Lê hikûmet giringî pê nedaye. Rêyên wan xirabin û paşmayek zêde li deverê hene û nayên paqijkirin. Her wiha cihên ku geştiyar li binê sihbera wan rûnin nehatine çêkirin. Daxwaz ji hikûmetê dikin xizmetê ji cihên geştiyarî re bike, daku dever bibe cihekî geştiyarî.”
(kş)
