Zêdeyî hezar kolikên geştiyarî di bin avê de man

Ji ber bilindbûna ava Bendava Dukanê zêdeyî hezar kolikên geştiyariyê di bin avê de man. Herwiha Serokê Şaredariya Dukan jî daxwaz ji geştiyaran kir ku nêzî rûbarê Zêyî Biçûk nebin.


Ji ber baran barîna zêde, ava Bendava Dukan bilind bû. Ji ber bilindbûna avê Rêveberiya Bendava Dukan biryar da ku rêjeya berdana avê zêdetir bike.

 

Serokê Şaredariya Dukan a ser bi Silêmaniyê Piştîwan Ehmed bi riya Rojnews'ê daxwaz ji geştiyaran kir ku di dema geştiyarê de nêzî rûbarê Zêyî Biçûk nebin û agahdarî xwe bin û got; "Heta niha ti ziyana giyanî çênebûye. Tenê kolikên geştiyarî yên nêzî Zêyî Biçûk bûn bin av bûne."

Yek ji xwediyê kolikan Rêbîn Letîf diyar kir ku hata niha zêdetirî hezar kolikên geştiyarî li Dukan bin av bûne û got; "Gelek ziyana me bûye. Eger weke salên berê bûya di vê demê de gelek geştiyaran serdana Dukanê dikirin."

Herwiha bi dehan hewzên xwedîkirina masiyan jî bin av bûne û masiyên wan wêran bûne.