Endamê Şandeya Aşitiyê ya Kurdistanê biparêze Salar Basîre, derbarê encamên serdana xwe ya ji bo Başûrê Kurdistanê de got, “Emê dagirkeriya dewleta Tirk bixin rapor û bigihînin NATO, nûnertiya NY ya li Amerîka û Iraqê, Hevpeymaniya Atlas, balyozxaneyên welatan, rêxistinên mafên mirov. Her wiha em ê encama wê ji bo raya giştî ya cîhanê eşkere bikin.”
Şandeya Aştî ya Kurdistanê biparêze ji heft kesayetên Kurd û biyanî pêkdihat ku nûnertiya 100 rêxistinan dikin, di 6’ê Hezîranê de ji bo rê li êrişên dewleta Tirk ên li ser Başûr, Rojava û Bakurê Kurdistanê bigrin, serdana Başûrê Kurdistanê kirin. Şande li Hewlêr û Silêmaniyê bi piraniya partiyên siyasî, parlamenter, nûnertiya HDP’ê ya li Başûr, PYD, Nûnertiya Bakur û Rojhilatê Suriye, rewşenbîr û kesayetan re civiya. Piştî hevdîtinên wan ên li gel aliyan temam bûn, şande vegeriya Ewropa. Niha ji şandeyê tenê Siyasetmedar Prof.Dr Salar Basîre wek nûnerê şandeyê li Başûr maye daku encamên lêkolîn û hevdîtinên şandeyê wek raporek amade bike.
Derbarê encama kar û xebatên şandeyê de Endamê Şandeyê Siyasetmedar Prof.Dr Salar Basîre di hevpeyvînek taybet de bersiva pirsên Rojnews da.
Şandeya Aştiyê kîne?
‘Em ê rapora xwe bigihînin NATO, NY û Ewropayê’
Şandeya me li dijî dagirkeriyê xwediyê peyama aştiyê ye, bi taybetî li dijî dagirkeriya dewleta Tîrk a li ser Kurdîstanê. Yek ji endamên şandeya me nûnerê Rêxistina Pêşkeftin a Navdewletî bû ku wek sîwan zêdetirî 100 rêxistin di nav xwe de kom dike. Peywendiya wan bi tevgerên azadîxwaz re hene. Li Amerîka, Asya ta Rojhilata Navîn. Ew raporên xwe digihînin NATO, Neteweyên Yekbûyî û Ewropayê.
Rapora ku hun amade bikin, hunê pêşkêşî kê bikin?
‘Emê encama raporê bi raya giştî re parve bikin’
Em ê li vir raporek amade bikin û bi çar zimanên cûda werger bikin. Piştre emê vê raporê bidin Nûnertiya Netewên Yekbûyî ya Iraq û Amerîkayê, Hevpeymaniya Atlas, balyozxaneyên welatan, rêxistinên mafên mirovan û saziyên ku giringiyê bi aştiya li dijî dagirkeriyê didin. Emê encama rapora xwe bi raya giştî re parve bikin.
Encamên ku Şandeya Aştiyê li vir gihiştê çine?
‘Li hin gundan PDK rê nade welatî xwarinê ji xwere bibin’
Em gihiştin hin encaman. Em li Hewlêrê li gel HDP’ê rûniştin, gelek gilî û gazindên wan ji PDK’ê hebûn ku PDK destura mayînê bi wan nade. Her wiha li gel PYD’ê jî rûniştîn, wan jî diyarkirin PDK rê nade ew li Hewlêrê baregeha xwe vekin, tenê li Silêmaniyê dikarin baregeha xwe vekin. Her wiha heta niha Parlementoya Herêma Kurdistanê ji bo şermezarkirina dagirkeriya dewleta Tirk ti helwestek nîşan nedaye. Ger hebe jî gelek lewaze.
Her wiha li gor zanyariyan, zêdetirî 100 baregehên leşkerî yên dewleta Tirk li Başûrê Kurdistanê hene. Gelek gund vale bûne. Her wiha hin gund hene ku PDK rê nade şêniyên wan gundan xwarin û pêdawîstiyên xwe bibin, ji wan re gotine hunê van pêdawîstiyan ji PKK’ê re bibin. Em li gel nûnertiya Netewên Yekbûyî û berpirsên wan runiştin. Me ji wan re behsa van hemû tiştan kir, wan jî gotin, ewan çavdêriya hemû tiştan kirine û dikin.
Hunê heta kengî li Kurdistanê bimînin û plana we çiye?
‘Ezê bimînim û nêrîna gel a li ser dagirkeriyê wergirim’
Ezê heta du mehên din li vir (Başûr) bimînim, raporê amade bikim. Gelek rêxistin, kesayet û alî hene ezê li gel wan hevdîtin bikim. Her wiha ezê nêrîna gel, gilî û gazindên wan ên li ser dagirkerî û hikûmeta Herêmê wergirim.
(kş)
