Fermandarê Xwebexş ê YNK’ê Xazî Feysel, diyarkir nasnameya Tirkiye li ser çeteyên DAIŞ’ê bi dest wan ketiye ku ew nasname li Tirkiyeyê jêre hatine derxistin. Xazî got: DAIŞ li gel dewleta Tirk li hevkiriye, her wiha li Çiyayê Qereçox ê Mexmûrê jî yekeya 80’ê ya ser bi PDK’ê û çeteyên DAIŞ’ê çavê xwe lihev digrin û şerê hev nakin.
Fermandarê Xwebexş ê Pêşmerge yê YNK’yî Xazî Feysel, derbarê zêdebûna êriş û tevgera çeteyên DAIŞ’ê yên hem wextê êrişên dagirkeriya Tirk a li ser Başûr bersiva çend pirsek ên Rojnews da. Xazî Feysel zanyariyên nû û giring eşkere kir. Her wiha helwesta partiya xwe ya li dijî dagirkeriya dewleta Tirk jî nîşan da.
Çeteyên DAIŞ’ê çawan serhildane?
‘Bi hemahengiya aliyek siyasî’
Di dawiya sala 2016’an de hikûmeta Iraqê bi dawîhatina DAIŞ’ê ragihand, lê mixabin di warê fikrî de her maye. Lê çeteyên DAIŞ’ê cardin zêde bûn, bi bernameyek siyasî li gel aliyek siyasî hemahengî kir û hatin ser çiyayê Qereçox. Hatin nav xaka Kurdistanê. Ev jî di demek de ye ku li Çiyayê Qereçox pêşmergeyên yekeya 80’ê a ser bi PDK’ê lê hene. Çeteyên DAIŞ’ê ji vî çiyayî car bi êrişê ser hêzên me û cotyarên xelkê deverê dikin.
Zêdebûna êrişên DAIŞ’ê peywendiya xwe bi çive heye?
‘Gumana me heye DAIŞ û Tirkiye hemwext êriş dike’
Destpêkirina êrişên DAIŞ’ê hemwextê êrişên dewleta Tirk e. Her wiha DAIŞ’ê êrişên xwe yên li ser welatiyên sivîl zêdetir kiriye. Gumana me heye ku DAIŞ û dewleta Tirk hemwext êrişê ser sivîlan dikin. Lihevkirin û hemahengî di navbera DAIŞ û pêşmergeyên yekeya 80’ê ya ser bi PDK’ê de heye û ev tişt ji gumanê jî derbaskiriye. Min ji wezîrê pêşmerge re got ku yek meh destur bidin em ê Çiyayê Qereçox ji DAIŞ’ê paqij bikin.
Li gor we lihevkirina DAIŞ’ê li gel kê heye?
‘Lihevkirin li gel DAIŞ heye û alîkariya wê tê kirin’
Li Çiyayê Qereçox hêzên DAIŞ û pêşmergeyên yekeya 80’ê ya girêdayî PDK’ê çavê xwe lihev digrin û şerê hev nakin. Her wiha peywendî û lihevkirinên DAIŞ’ê li gel dewleta Tirk û aliyek siyasî heye. DAIŞ ji aliyê hêza ku cîranê wê ye ve tê destek kirin û alîkariya wê tê kirin. Ev yek bi veşartî tê kirin, lê ji tevgera wan eşkere ye ku bihevre ne. Em ji vê siyasetê bi fikarin.
Nasnameya çeteyên DAIŞ’ê çiye?
‘Li Tirkiyeyê nasname ji bo DAIŞ’iyan tê çêkirin’
DAIŞ’iyên ku li Iraq û deverê di dema şer de nasnameya wan diketin destê me, ji kevne Baasî û Suneyên tundrew bûn. Car car jî nasnameya Tirkiye li ser hin ji wan derdiket ku ew nasname li Tirkiyeyê ji bo wan hatiye çêkirin. Her wiha li Tirkiyeyê jî DAIŞ’î ber bi Suriye û xaka Herêma Kurdistanê ve tên şandin. Hejmara şaneyên wan ên razayî ji hejmara çekdarên wan zêdetire.
Peyama we ji bo hêzên PDK’ê çiye?
‘Şermezariye..’
Ez livir ji biraderên PDK’ê re dibêjim, şermezariye ji bo hemû gelê Kurd ku çekdarên DAIŞ’ê li Çiyayê Qereçoxê tên pêşmergeyan şehîd dixin û bi selametî vedigerin. Divê were zanîn ev şikestine ji bo tevayî Kurdan. Ger hun çavê xwe lê digrin mijarek siyasî û lihevkirin heye, pêwîste ev yek were zanîn. Heta em yekgirtina xwe çênekin, wê rewşa me xirabtir bibe.
‘Helwesta YNK’ê li beramberî dagirkeriya dewleta Tirk çiye?
‘Helwesta me li dijî dagirkeriyê ye’
Helwesta me li dijî dagirkeriyê ye, divê PDK xwe di berçavan re derbaske. Em ji wan re pêşniyar dikin ku helwesta xwe diyarkin û ewqas nekevin di jêr bandora Tirkiye de. Em ne li dijî ti netewekê ne, lê em li dijî wê siyaseta qirêjin ku tên zarok û welatiyên me yên sivîl şehîd dixine. DAIŞ li Qereçoxin, li tenişta Kampa Mexmûrê ne. Em û şêniyên kampê bi hevre parastina xwe dikin daku DAIŞ’î neyên û me şehîd nexin. Bi dûriya sedan kîlometre balefirên Tirk tên li sivîlan dixin û şehîd dixin, lê li DAIŞ’ê naxin.
Hun gerîla û PKK’ê çawan dibînin?
‘Parêzerê nîştimanin’
Ez PKK’ê wek hêzek şoreşger û nîştimanî dibînim. Her kesayet, rêxistin, hizb û hêzek ji bo xak, gel û nîştiman têbikoşe, em wê wek şoreşger dibînin. Gerîla wek parêzerê nîştiman dibînim. Heta niha min nedîtiye bi ti awayek li gel dagirkeran hemahengî kirine.
(kş)
