Berxwedana li Deriyê Sêmalka ya ji bo wergirtina cenazeyên gerîlayên di kemîna PDK’ê de şehîd bibûn di roja 83’yan de bi biryardariyek xurt didome. Dayîka bi navê Sebah Remedan ku di çalakiya Deriyê Sêmalka de cih digire û dayîka Emîne Îke ku li Wargeha Mexmûrê ye, bi yek dengî gotin: “Em cenazeyên zarokên xwe dixwazin!”
Li ber Deriyê Sînor ê Sêmalka, çalakiya ku ji bo wergirtina cenazeyên gerîlayên ku di kemîna PDK’ê de şehîd bibûn, li ber baran û sermayê bi biryardariyek xurt di roja 83’yan de dewam dike.
Têkildarî vê çalakiyê, dayîka bi navê Sebah Remedan ku niha di çalakiya li Deriyê Sêmalka de cih digire û dayîka bi navê Emîne Îke ku li Wargeha Penaberan a Şehîd Rustem Cûdî (Mexmûr) dijî, ji ajansa me re axivîn.
Dayîka Sebeh Remedan di destpêka axaftina xwe de êrişên PDK’ê yên li ser wan û tevahî gelê Kurd bi tûndî şermezar kir û diyar kir ku nêzikatiyên PDK’ê yên li beramberî Kurdan, dijminatiye.
‘PDK û Mala Barzanî îxanetê li Kurdan dike’
Dayîka Sebah wiha qala armanc û berxwedana çalakiya li Deriyê Sêmalka kir: “Em di kesayeta Şehîd Mezlum Dogan de tevahî şehîdên Kurdistanê bibîrtînin û bejna xwe li beramberî keda wan ditewînin. Çalakiya me 83 roj li pey xwe hişt û ti kes nemaye ku armanca me nezane. Em tenê cenazeyên zarokên xwe dixwazin. Ti armancek a me ya cûda nîne. Ji aliyê tevahî sazî û destgehên Rojava ve, ev çalakî dewam dike. Her roj em peyama xwe û armanca xwe dûbare dikin. Lê belê tenê PDK û Mala Barzanî, çavê xwe li me digire. Em her roj cenazeyên xwe ji destê dewleta Tirk a hov distînin, lê em nizanin çima ev Mala Barzanî wisa li me dike. PDK û Mala Barzanî îxanetê li gelê Kurd dike.”
Dayîka Sebah Remedan di nava axaftinên xwe de diyar kir ku ew jî di nav de, sê caran şandeya Dayîkên Aştiyê çûne li ber deriyê sînor û daxwaza cenazeyên zarokên xwe kirine û PDK’ê jî ji dayîkan re gotine; ‘herin cenazeyên zarokên we li Îranê ne!’
‘Bi girtina deriyan nikarin me bitirsînin’
Dayîka Sebah di dewama axaftina xwe de behsa nêzîkatiyên PDK’ê yên li beramberî dayîkan kir û got: “Bi axaftinên nexweş û zextan, em ji derî vegerandin. Ciwanên me xwestin peyama xwe ragihînin, lê PDK’ê êrîşî ciwanên me kir. Ez şahidê wê bûyerê me, êrişên PDK’ê yên li ser me nayê qebûlkirin. Wan bi kevir şerê me kir, me jî ji bo parastina xwe kevir avêtin wan. Nêzikatiyên wan yên dijminane, divê ji aliyê her Kurdekî ve bê şermezarkirin. Em jî dibêjin ciwanên me rûmeta me ne, me bi ciwantî destpêkir û emê bi ciwantî serbikevin. Girtina deriyê sînor ti eleqeya xwe bi siyasetê ve nîne, raste rast dijmintî ye. Ew bi girtina deriyan nikare me bitirsîne. Heta ku daxwazên me pêkneyên em dest ji çalakiya xwe bernadin.”
Herî dawî Dayîka Sebah Remedan bang li tevahî dayîkên Kurdan kir da ku ji bo îxaneta Mala barzanî dakevin qadan û pişrgirî bidin çalakiya Deriyê Sêmalka.
‘Em cenazeyên zarokên xwe dixwazin’
Dayîka ji Wargeha Mexmûrê ku bi navê Emîne Îke di detspêka axaftina xwe de çalakiya li Deriyê Sêmalka ji dil û can silav kir û wiha piştgiriya xwe anî ser ziman: “Wek malbatên şehîdan, em heta dawiyê piştgiriya çalakiya ji bo wergirtina cenazeyên zarokên xwe dikin û em dizanin ku ev çalakî ya me tevane. Ev 83 roje dayîkên me hemû li ber serma û êrişên PDK’ê berxwe didin û daxwaza cenazeyên zarokên xwe dikin. Em jî wek dayîk bang dikin, cenazeyan (zarokên me )bidin me! Ev çalakî rûmeta me ye û divê em xwedî li rûmeta xwe derbikevin. Zilma herî mezin PDK li Kurdan dike. Divê em rasitya PDK’ê baş bizanin û li gor wê jiyan bikin.”
Dayîka Emîne Îke di dawiya axaftina xwe de diyar kir ku îxaneta herî mezin PDK li Kurdan dike û bang li tevahî gelê Kurd, malbatên şehîdan û malbatên pêşmergeyan kir da ku li pêşiya zilma PDK’ê bibin xwedî helwest.
