Îsal ji hemû salên borî zêdetir jin bi berhemên xwe yên Kurdewarî ku bi keda destê xwe amadekirine, beşdarê festîvala 7’emîn a Hinaran ya li Helebceyê bûne û bi ferqa ku çêkirine mohra xwe li festîvalê dane.
7’emîn Festîvala Hinar ku 14’ê Cotmehê li parêzgeha Helebceyê destpêkiriye, bi beşdarbûna çalak a jinan dewlemendtir bûye. Berhemên jinan ên di festîvalê de mohra xwe li festîvala îsal daye û ji 450 kesên beşdarê festîvalê bûne 300 jê jinin. Jinên ku hemû herêmên Başûrê Kurdistanê tevlî festîvalê bûne, kêfxweşiya xwe bi ajansa me re parvekirin.
Jina ciwan a zanko xilas kiriye Bersîn Îzet ya Helebceyî, bi hinarên xweş û xwezayî beşdarî festîvalê bûye. Bersîn têkildarî beşdarbûna xwe ya ji festîvalê re wiha axivî: “Saleke min zanko qedandiye. Li festîvalê de hinar difiroşim. Jin di vê festîvalê de xwedî roleke girîng e. Eger di rojên normal de ez weke jinek fêkî bifiroşim civak bi çaveke nexweş lê temaşe dike, lê di festîvalê de ev şikestiye.”
Ji derveyî hinar û berhemên hinar gelek berhemên xwemalî yên weke xwarin, fêkî, çerezat, hunerên dest jî tên nîşandan.
Huda Omer û Soma Kerîm ku hevalên hevin û beşa çandiniyê zankoyê qedandine saleke li Biyare (Helebce) kargeheke şîrîniyê vekirine û berhemên xwezayî yên Hewramanê ji bo şîrîniyan bikartînin.
Soma Kerîm diyar kir cara çareme ku beşdarê li vê festîvalê kiriye û got: “Berhemên me ji tu, mewîj, behîv, Gûz, Kizwan pêktê. Ev berhemên me tev xwezayîne û bi dilê xelke. Emê dema pêş bi berhemên zêdetir beşdar bibin.”
