Li gorî jinan eger xwe perwerde bikin, bixwînin û xwe kûr bikin, wê bikarin li hemberî hemû şîdeta li hemberî wan tê kirin derketin û diyar kirin ku nabe jin li hemberî binpêkirina mafên xwe bêdeng bin.
Her sal li seranserî cîhanê bi boneya 25’ê Mijdarê Roja Têkoşîna Dijî Şîdeta Li Ser Jinan çalakiyên rengareng tên kirin û li dijî şîdetê derdikevin û banga dawîlêanîna şîdetê dikin. Jinên Başûrê Kurdistanê yên li ser mijarê ji Rojnews’ê re axivîn, diyar kirin ku divê jin xwe zêdetir rewşenbîr bikin û li hemberî şîdetê derkevin.
Perwerdevan Tirîfe Celal têkildarî rola jinan a di nava civakê de û lihember derketina şîdeta li hemberî jinan got: “Em dixwazin malbat bihêz be û jin û mêran lihevkirinek hebe. Ya li ser axaftin tê kirin nirxê bextewarî û aramiyê ye, dawîlêanîna şîdetê ye. Sedemên şîdetê zêde ne. Jîngeha jiyanê û siyaseta welat beşek ji sedema şîdetê ye.”
Tirîfe Celal wiha domand: “Divê timî kar li ser vê yekê bikin ku jin bihêz be û şiyar be. Eger jin bihêz be, dikare sînorekê ji bo kesên li hember şîdetê dike deyne. Ev wiha dike jin parastî be. Eger jin û mêr hevkar û temamkerên hev bin, wê ji bo zarokan bibe perwerdeyek baş û ji şîdet û zihniyeta mêrsalarî dûr bin.”
Herwiha Hêlim Ekrem pêşniyar dike ku ji bo şiyarbûna dijî şîdetê jin bixwînin û got: “Xwendin ji bo jin, zarok, gel û neteweyan çekeke ku dikarin xwe pê biparêz in. Şîdet encama cahîlbûn û nexwendewariyê ye. Ji bo jin ji bin desthilata mêr derbikeve û azad bibe, xwe bi xwe bi rêze bibe, divê ti caran li hemberî zilma li ser wan tê kirin bêdeng nebin. Divê jin pişta xwe bidin xwe.”
(ab)
