Li Wargeha Şehîd Rustem Cûdî (Mexmûr) Rojnameger Denîz Firat di 6’emîn salvegera şehadeta xwe de li cihê ku lê şehîd bibû bi merasîmekê hat bibîranîn.
MEXMÛR/ROJNEWS
Li Wargeha Şehîd Rustem Cûdî (Mexmûr) Rojnameger Denîz Firat di 6’emîn salvegera şehadeta xwe de li cihê ku lê şehîd bibû hat bi bîranîn. Hevpîşeyên wê tevlî merasîma bîranînê bûn. Merasîm ji aliyê endamên çapemeniyê ve hate organîzekirin. Di destpêka merasîmê de, di kesayeta Şehîd Denîz Firat de ji bo tevahî şehîdên Tevgera Azadiya Kurdistanê deqeyek rêz hat girtin. Piştî rêzgirtinê jinbava Şehîd Denîz Firat Sultan Yildiztan û li ser navê çapemeniyê jî Fîlîz Budak axivîn.
Sultan Yildiztan bal kişand li ser hovîtiya çeteyên DAIŞ’ê û şehadeta Şehîd Denîz û got: “Denîz Firat ji aliyê çeteyên hov ên DAIŞ’ê ve li vir di 8’ê Tebaxê de tê şehîd xistin. Her çiqas cenazeyê wê ne li vêderê ye lê em her sal ji bo bîranîna Şehîd Denîz tên vî cihî û wê bi bîrtînîn. Piştî şehîdbûna Denîzê me li vêderê zeytûnek çandiye, her çiqas cihekî dêmî û çole jî lê hîn jî şîne û hişk nebûye. Wek tê gotin ‘Dara ku bi xwîna şehîdan tê avdan ti caran hişk nabe û her tim şîne.’ Di kesayeta Şehîd Denîz Firat de hemû şehîdên Çapemeniya azad bi bîrtînim û bejna xwe li ber wan di tewînim.”
Li ser navê çapemeniyê Fîlîz Budak jî di destpêka axafitina xwe de, di kesayeta Şehîd Denîz Firat de, hemû Şehîdên çapemeniya azad û şehîdên berxwedana Mexmûrê bi bîranî û wiha domand: “Beriya niha 6 salan ango di 8’ê Tebaxa 2014’an de di berxwedana parastina gelê Mexmûrê de gelek kes şehîd ketin, yek ji wan jî Denîz Firat e. Denîz Firat ji bo ku bikare şerê li vêderê tê meşandin û berxwedaniya ku di vê çolê de li ber şert û mercên xwezayê û di heman demê de li hemberî çeteyên DAIŞ’ê û çeteyên dewleta Tirk a ku di hat meşandin ji bo bikare rastî û berxwedana vêderê bi raya giştî re bide parvekirin dibe hedefa çeteyên DAIŞ’ê û tê şehîdxistin. Şehîd Denîz di wan sê rojên şerê li ser Wargeha Mexmûr dihat meşandin de hewil da rastiya heyî kêlî bi kêlî ji raya giştî re ragihîne.”
Budak di dawiya axafitina xwe de bi bîrxist ku ew şehîdên xwe bi minetdarî bi bîrtînin û heta jiyan bikin wê li pey şopa şehîdên xwe bin.
(ab-ah/rn)
