Welatî ji ber êrîşên Tirkiyê nikarin bi dilê xwe pincar kom bikin

Welatiyên binarê Qendîlê ji ber zêdebûna êrîşên balafirên şer yên Tirk û balafirên keşfê, her wiha baran barîna zêde îsal nekarîne ji bo debara jiyana xwe bi dilê xwe pincarên baharê kom bikin. Welatiyên herêmê dibêjin, eger rewş asayîbe û baran nebare ew dikarin rojane herî kêm 50 heya 80’ê hezarî ji komkirina pincar bidest bixin.


Gundiyên Qendîlê ji bo debara jiyana xwe bikin salane di demsala baharê de derdikevin çiya û pincar kom dikin. Lê îsal hem ji ber zêdebûna êrîşên hewayî yên balafirên şer yên Tirk, hem baran barîn û berfa zêde nekarîne bi dilê xwe derkevin çiya û pinar kom bikin. Her wiha dibêjin ji ber rewşa hewayê pincarên baharê dereng derketine û nû nû welatî ji bo komkirinê derdikevin çiya û zozanan.

Em debara xwe bi pincarê baharê dikin

Jina bi navê Kiwêstan Hesen ya ji gundê Enzê ya binarê Qendîlê ku mijûlê komkirina pincare, diyar kir piraniya jinên Binarê Qendîlê di demsala baharê de ji bo komkirina giya derdikevin çiya û got, “Di hemû demsalên baharê de piraniya jinên Qendîlê ji bo debara jiyana xwe bikin pincar kom dikin. Em pincarên ku kom dikin difiroşin û dahateke baş jê digirin. Piraniya pincarên ku em kom dikin Karî, Soryas, Rêwas, Kivark û pincarên mîna vanin.”

Welatî ji tirsa balafirên şer ên Tirkan nikarin bi dilê xwe pincar kom bikin

Kiwêstan got ku her sal welatî ji bo komkirina pincar zêdetir berê xwe didan van herêman û wiha axivî, “Ji ber bombebarana balafirên şer yên Tirk û balafirên keşfê welatî weke berê nikarin bi dilniyayî werin van herêman û pincar kom bikin. Heman metirsî li ser jiyana me jî heye, em jî nikarin bi dilê xwe pincar kom bikin. Dema em diçin jî bi tirs diçin. Berê me hesp û hestirên xwe jî li gel xwe dibir. Eger metirsiya bombebaranê li ser me nebe, rojane em dikarin 50 heya 80’ê hezar dînar bidest bixin.”

Hinek pincar ji ber rewşa hewayê dereng derketin

Welatiyê bi navê Ebdulla Xidir yê niştecihê gundekî din yê Binarê Qendîlêye jî dibêje, bilindahiya çiyayên Qendîlê di warê giya û pincar de pir dewlend û bi berekete û got, “Welatiyên herêma Raperîn, Çoman û Riwandizê di demsala baharê de ji bo komkirina pincar berê xwe didin binarê Qendîlê. Ji ber îsal baran û berf zehf barî welatî nû tên ji bo komkirina pincar.”

Pincar baş tê firotin

Firoşyarekî pincar yê li nava bazara Ranyayê Ako Mihemed diyar kir ku ew rojane diçin derdora gundên Qeladizê û Qendîlê ji bo pincar ji welatiyan bikirin. Me bi hinek kesan re li hev kiriye û dibêjin rojane ev qas pincar ji bo me bînin. Ez zêdetir rewash û kiwan difiroşim û di van rojên dawiyê de rewas gelek tê firotin.

Cihekî me yê li ber baxê giştî yê Ranya heye, polîs bi bahaneya ku ciheke qelebalixe destûrê nade em li wir pincar bifiroşin, eger em dezgeha xwe li wir deynin pincar û giyayên me yên baharî dê zehf bên firotin.”

(bz)