Çalakiya ajokarên Herêma Germiyanê ya dijî bûhabûna sotemenî û benzînê ku çend saet rêya navbera Silêmanî-Kelarê girtin, diyar kirin heya daxwazên wan neyên bicihanîn û nirx danekeve ewê dest ji çalakiyên xwe bernedin.
Îro serê sibehê gelek ajokarên bajaroka Kelar ya ser bi Germiyanê li dijî bilindbûna nirxê sotemenî û benzînê çalakî lidarxistin. Ajokar ji bo balê bikişînin ser daxwazên xwe rêya sereke ya Silêmanî-Kelar girtin.
Di van saetan de çalakî îro bi dawî bibe jî, lê li gorî agahiyên ku hinek ajokar dane ajansa me heya daxwazên wan neyên pêkanîn, ewê çalakiyên xwe bidomînin.
Ajokarê pasê Imer Ebdulla diyar kir ew pereyê ji rêwiyan digire, ancax têra benzînê dike û ti sûdek jê nagire û got: “Debara min li ser ew pereyê ku ji pasê digirime. Ez bixwe nexweşim, lê pereyê min nîne ez biçim tehlîlên xwe çêbikim. Em vê rewşê qebûl nakin û emê li ser van daxwazên xwe israr bikin.”
Ajokarê bi navê Mihemed Hadî jî diyar kir yên tevlî çalakiyê bûne hemû esnafin û hejarin. Hadî diyar kir desthilata Herêma Kurdistanê ji vê rewşê berpirsyare û heya daxwazên wan neyên bicih anîn ewê di çalakiyên xwede berdewam bin.
Çalakiyên dijî giranbûna sotemenî, benzîn û bazarê li seranserê Herêma Kurdistanê belav dibe û tevî nerazîbûnan jî ti guhertinek erenî di nirx de çênebûye.
(bz)
