Rojnamevan û parêzerên Ranyayê diyar kirin, ne di cih de ye mirov ji PDK’ê bixwaze ku pêşî li êrişên dewleta Tirk bigre û gotin: “Ji berku PDK bi her awayî ketiye di xizmeta dewleta Tirk de û hêzên din jî li xwe alandiye û wan bê helwest hiştiye. Tenê gerîlayên PKK’ê dikarin pêşî li xewna dewleta Tirk a dagirkeriyê bigrin.”
Êrişên dewleta Tirk ên bi armanca dagirkirina xaka Başûrê Kurdistanê ji 17’ê Nîsana 2022’an ve bi hevkariya PDK’ê berdewam dikin. Aktivîstên navçeya Ranyayê jî li dijî hevkariya PDK’ê ya li gel dewleta Tirk ji Rojnews re axivîn.
Rojnamevan Renc Osman da zanîn armanca dewleta Tirk ne tenê ewe ku hin deverên Başûrê Kurdistanê têxe bin kontrola xwe. Renc got: “Armanca dewleta Tirk ji wê yekê gelek mezintire. Dixwaze sinorên berê yên Osmaniyan carek din bixe dibin kontrola xwe de û dagir bike. Niha ti astengiyek li pêşiya vê dagirkeriya Tirk nine. Berovajî hemahengî û hevkariya hin hêzên Kurdî li gel dewleta Tirk de hene ji bo dagirkirina xaka Kurdistanê.”
Di dewamê de Renc Osman destnîşankir PDK bûye nokerê dewleta Tirk û wiha domand: “Ev jî wê yekê derdixe ku hêzên Kurdî ne hêzên nîştimanî netewî ne. Ne bi hestên civaka Kurdî re ne. Roja hatîn avakirin bi plana îstixbaratên herêmî re tevdigerin û li gor berjewendiyên wan di meşin. Ji bilî gerîlayên azadiya Kurdistanê, ti hêzek din rê li pêşiya dagirkeriya Tirk nagirin.”
Her wiha Rojnamevan Renc Osman got, “Nabe daxwaz ji PDK’ê were kirin pêşî li êriş û dagirkeriya Tirk bigrin. Ji berku PDK bi her awayî ketiye di xizmeta dewleta Tirk de. Ji bona wê zehmete bikare dest jê berde. Ne tenê PDK, hêzên din ên Başûr jî bi rêya PDK’ê xwe li van berjewendiyên li gel Tirkiyeyê alandine. Ev jî xizmetê ji dewleta Tirk re dike. Lê PKK bi dijwarî rêgirî li xewna Tirkiyeyê dike. PKK ne tenê bo Qendîlê, bo hemû Kurdistanê gelek giringe. Ger PKK nebe, Tirkiye wê dagirkeriya xwe leztir bike û zûtir Kurdistanê dagir bike.”
Derbarê mijarê de Parêzer û Aktivîstê Siyasî Letîf Haris jî got: “Dewleta Tirk sud ji parçebûna nava Kurdan digre. Bi taybetî siyaseta aloz û ne exlaqî ya ku PDK di meşîne bûye sedem Tirkiye zêdetir sûd ji aloziya nava Kurdan wergire. Ev jî wê yekê nîşan dide, her hêzek siyasî ne di berjewendiya gelê xwe de be û bingehê demokrasî û pêşxistina jiyana gelê xwe armanc neke, serî li hêzên dagirker dide. PDK’ê jî heman kar kiriye û wê ji beriya her kesê ziyan bigihe wê. Lê ji bo hebûna xwe berdewam bike, guh nade wan ziyanan.”
Letîf Haris behsa armanca PDK’ê ya hevkariya bi dewleta Tirk re jî kir û diyarkir; “Du armancên PDK’ê yên ji bo hevkariya bi dewleta Tirk re hene. Yan PDK dixwaze bi hatina dewleta Tirk re heman rola mîrnişînên Kurdan bibîne û bibe noker li dijî hêzek din a Kurdî, yan jî pişta xwe daye deng û razîbûna gel a li siyaseta wê û ji bo wê jî çuye serî.”
Rojnamevan Diyarî Mihemed jî da zanîn PKK ezmûnek dîrokî di komkirina xebata beşên cûda de heye. Diyarî Mihemed got: “Daxwaz ji tevayî aliyên siyasî dikim li dijî dagirkerî û dijminên gelê Kurd yekgirtî û yekhelwest bin.”
(kş)
