Du li herêma Biradost leşkerên artêşa Tirk a dagirker ketin nav 4 gundan û gef li şêniyên wan gundan xwarin. Leşker bi muxtar û xelkê gundan re civiyan û ji wan xwestin ku dijî gerîlayên PKK’ê sîxuriyê bikin.
Duh danê siharê bi dehan leşkerên artêşa Tirk a dagirker ketin gundên Xelîfan, Lêlkan, Helkêla û Kunele yên ser bi bajaroka Sîdekan a ser bi navçeya Soran a Hewlêrê ku dikevin herêma Biradostê.
Li gorî agahiyên ketine destê me de, nêzî 100 leşkerên dagirker ketibûn nava gundan. Leşkerên Tirk ên bi muxtar û xelkê gundan re civiyan, ji xelkê gundan xwestin liv û tevgera gerîlayên bişopînin. Lê xelkê wê herêmê vê daxwaza leşkerên Tirk redikirine û ji leşkerên Tirk re gotine; “Em tenê karê xwe yê rojane dikin, em derbarê ti hêzekê de agahî kom nakin.”
Gorî heman agahiyan leşkerên Tirk di dema civîna bi welatiyan re, kêşandina wêne û girtina dîmen qedexekirine, lê bi xwe wêneyên muxtar û xelkê gund qeyd kirine.
Xelkê gund ji çûyîna leşkerên Tirk ya nava gund nerazîne û weke gef li ser xwe dibînin. Xekê herêmê dibêjin ew ji ber baregehên dewleta Tirk nikarin bi awayek asayî jiyana xwe dewam bikin, ji ber ku leşkerên Tirk rê nadin kes nêzî baregehên wan bibin.
Hêjayî gotinê ye Artêşa Tirk a dagirker li Herêma Kurdistanê zêdetirî 40 baregehên leşkerî avakiriye. Tevî binpêkirina serweriya xaka Iraqê ye, lê hikûmeta navendî û ya Herêma Kurdistanê bêdeng in.
(nr)