Berpirsê Malbenda Du a YNK’ê ya Kerkûkê Rewend Mela Mihemed, bersiva gefên Serokê berê yê Eniya Tirkmen a Iraqê Erşed Salihî da û got; “Ger tu xwe wek zilamê Tirkan û Atatûrk dibînî, li Tirkiyeyê bimîne û bijî. Ji berku xelkê Kerkûkê wê bixwe biryara çarenûsa Kerkûkê bidin, ne tû.”
Duh Serokê berê yê Eniya Tirkmen a Iraqê û parlementerê dema nû ya Kerkûkê Erşed Salihî di serdana xwe ya bajarê Sakarya ya Tirkiyeyê de desthilata Bexda-Hewlêrê tehdît kir. Salihî îdîa kir ku Iraq û Başûrê Kurdistanê ya Tirkmena ne û Kerkûk ji aliyê Mustefa Kemal (Atatûrk) ve emanetê wan hatiye kirin.
Li ser van gefên Salihî, Berpirsê Malbenda Du a YNK’ê ya Kerkûkê Rewend Mela Mihemed li ser hesabê xwe yê Facebook’ê peyamek belavkir û bersiva Salihî da.
Rewend Mela Mihemed di peyama xwe de got; “Ger tu xwe wek zilamê Tirkan û Atatûrk dibînî, li Tirkiyeyê bimîne û bijî. Ji berkû Kerkûk bajarê me ye û xelkê Kerkûkê wê bixwe biryara çarenûsa Kerkûkê bidin, ne tû.”
Di beşek din a peyamê de hat gotin, “Divê ti demê mirov ne li bendê be ku wê Erşed Salihî gotinek baş bike. Li kuderê bazar germ be, ew gotina xwe li wir dike. Lê ev gotinên wî li cem Kerkûkiyan ti qîmeteke xwe nine.”
Salihiyê Tirkmen Bexda-Hewlêrê tehdît kir: Emê vê coxrafyayê ji were nehêlin!
(kş)
