Hevseroka nû ya Meclîsa Gel a Wargeha Penaberan a Mexmûre Filîz Bûdak diyar kir bi polîtîkayên dorpêçê hewl didin statûya wargehê jê bistînin û got: “Gelek pirsgirêkên ji ber vê sedemê ji bo wargehê çêbûne û gel tengav dike hene, emê ji bo çareserkirina wan hewldanên pêwîst bidin û erka xwe bicîh bînin.”
2.Kongreya Meclîsa gel a Wargeha Penaberan ya Şehîd Rustem Cûdî (Mexmûr) di 7’ê Çileya 2022’an de bi diruşmeya ‘Bi ruhê berxwedana Werxelê, têkoşînê bilind bikin, statuya Kurdistanê û azadiya Rêber Apo ya fîzîkî mîsoger bikin’ hat li darxistin. Di kongreyê de hevserokên nû Filîz Bûdak û Yûsûf Kara hatin hilbijartin.
Hevseroka nû ya Meclîsa Gel a Mexmûrê Filîz Budak encamên kongreyê û plansaziya li pêş meclîsê nirxand.
Filîz Bûdak dazanîn hem êrîşên hewayî yên dewleta Tirk ên li dijî Mexmûrê, hem jî hewldanên Iraqê yên dorpêçkirin û jê girtina statûya wargehê, hem jî qedexeya çûyîn û hatinê ya li ser wargehê di rojeva wan de bûye û ji bo parastina wargehê nîqaşên pêwîst hatine meşandin.
Bûdak diyar kir di kongreyê de xebatên ji bo azadiya fizîkî ya Rêber Ocalan, rewşa ewlekariyê ya Mexmûrê, dorpêç û zextên li ser wargehê, pirsgirêkên aborî û perwerdehiyê yên çavkaniya xwe ji dorpêçê digirin hatine nirxandin û ji bo çareseriya wê jî pêşniyar pêşketine û plansazî hatine derxistin.
Filîz Bûdak diyar kir ji ber dorpêça PDK’ê ya li ser wargehê rewşa xwendekarên divê biçin zankoyê jî têkçûye û danîn li ser vê mijarê bi taybet hatiye axaftin û ji bo çareseriya wê jî hewldanên pêwîst dê werin dayîn.
Her wiha li ser pirsgirêkên aboriyê jî Bûdak diyar kir komîteya aboriyê ya meclîsê wê li ser mijarê bixebite û alternatîfên ji bo çareseriyê pêşbixin.
Ji bo rêzik û pîvanên meclîsa Îştar ji bo jiyana civakî ya wargehê daniye jî Bûdak diyar kir, ew weke meclîsa gel diber pêkanîna peyman û biryarên civakî yên Meclîsa Îştar de jî berpirsyarin û ewê weke jinek bibin pira di navbera meclîsa gel û meclîsa jin a Îştar de.
Bûdak têkildarî planên ji bo ciwanên wargehê jî wiha axivî: “Ji bo em ciwanên xwe ji pergala modernîteya kapîtalîst dûr bixin û hişmendiya netewa demokratîk pêşbixin, emê hewl bidin aktîvîteyên çandî, werzîşÎ û civakî yên ji bo ciwanan zêde bikin.”
Li ser xebatên zanistî û nivîskî jî Bûdak dazanîn ewê hewl bidin xebatên nivîskî yên li ser wargehê li navendên fikrî zêde bikin û heta dikarin ji bo wargehê kampên Jineolojiyê jî rêxistin bikin.
Filîz Bûdak her wiha dazanîn wan di kongreyê de hem gelek biryar girtine hem jî plansaziya du salan a xebatê derxistine û got: “Emê erka ku ji bo me hatiye dayîn bicîhbînin.”
(bz)
