Li Silêmaniyê çalakvanên sivîl li dijî bikaranîn çekên kîmyawî û êrişên dewleta Tirkiye û Îranê daxwaznameyek pêşkêşî Parlamentoya Herêma Kurdistanê kirin û ragihandin: “Her du hikûmetên Îran û Tirkiyeyê bi eşkere êrişî serweriya xaka Herêma Kurdistanê dikin. Bang dikin ku di zûtirîn dem de Parlamentoya Herêma Kurdistanê runiştinek taybet li ser êrişên hovane û ne rewa yên dewleta Tirk û Îranê li darbixe.”
Li parêzgeha Silêmaniyê çalakvanên sivîl li dijî bikaranîna çekên kîmyawî û dagirkeriya dewleta Tirk a dagirker û êrişên rejîma Îranê daxwaznameyek pêşkêşî Ofîsa Parlamentoya Herêma Kurdistanê ya li Silêmaniyê kirin. Piştre li ber avahiya Parlamanetoyê daxuyaniya çapemeniyê dan.
Di daxuyaniya ji aliyê çalakvana sivîl Gerde Mawe Heme ve hatî xwendin de ev tişt hatin gotin: “Êdî bêdengiya xwe ya li beramberî êriş û dagirkeriya her du dewletên Tirkiye û Îranê, her wiha li beramberî şehîdxistina welatiyan û derbazkirina sînorên xaka me û dagirkeriya herêmekê berfireh ku li gorî yasayên navneteweyî suce, bişkênin. Ji ber bombebaran û topbaranên Îran û Tirkiyeyê xelkê herêmê û gundên derdor gelek ziyanên mezin yên madî û canî girtine, malên wan xirab bûne û penaber bûne.
Dewleta Tirk a dagirker li çiyayên Zap, Metîna û Avaşînê ser şoreşgerên Kurd çekên kîmyawî û fosforê bikartîne. Li nav bajaran endamên aliyên siyasî qetil dike. Her du hikûmetên Îran û Tirkiyeyê bi eşkere êrişî serweriya xaka Herêma Kurdistanê dikin. Em dibêjin ku di demek nêzîk de wê êrişên hewayî û bejahî destpê bike. Ev yek jî li ber çavê hikûmeta Iraqê, hikûmeta Herêma Kurdistanê û civaka navneteweyî tê pêkanîn.”
Di dawiya daxuyaniyê de bang hate kirin ku di zûtirîn dem de Parlamentoya Herêma Kurdistanê runiştinek taybet li ser êrişên hovane û ne rewa yên dewleta Tirk û Îranê li darbixe.
Herî dawî de jî bang li hikûmeta Iraqê hat kirin ku daxwaz ji konsol û nunerên welatan bikin ku bêdeng nemînin û rê li êrişan bigrin.
(fk)
