ELÎ QADIR / ROJNEWS
Welatiyên Binarê Qendîlê diyar kirin ku divê gel li dijî bikaranîna çekên kîmyawî ku dewleta Tirk bi kar tîne dakeve qadan û bang li rêxistinan kirin ku ji bo lêkolînê serdana wan cihên çekên kîmyawî hatine bikaranîn bikin.
Welatiyên Binarê Qendîlê têkildarî bikaranîna çekên kîmyawî ku dewleta Tirk a dagirker li hemberî gerîlayên azadiyê û sivîlan bikar tîne ji Rojnews’ê re axivîn.
Hevşaredara Şaredariya Binarê Qendîlê Awaz Îsmaîl got: “Dewleta Tirk a dagirker di êrişên hewayî û bejahî de şikestiye, lewma çekên qedexekirî yên kîmyawî bi kar tîne. Bikaranîna van çekan dûrî hemû nirxên mirovahiyê, exlaq û wijdanê ye.”
Awaz Îsmaîl diyar kir ku berxwedan û têkoşîn ne teyê erka gerîlaye, erka her kesê ye û bi taybet Başûrê Kurdistanê ye ku divê mil bi milê gerîla parastina xak xwe bikin û wiha domand: “Divê welatî li benda aliyên siyasî nerawestin û dakevin qadan. Ji ber ku aliyên siyasî ji bo berjewendiyên xwe û tîjekirina berîka xwe siyasetê dikin.”
Hevşaredara Şaredariya Binarê Qendîlê Awaz Îsmaîl bang li hemû rêxistin û aliyên peywendîdar kir ku serdana wan herêmên ku çekên kîmyawî hatine bikaranîn bikin û bi çavê xwe bibînin û helwestek cidî nişan bidin.
Welatiye Binarê Qendîlê Çiya Serdeşt jî got: “Divê gelê me dakeve qadan û ji Neteweyên Yekbûyî re bêje, çekên kîmyawî li dijî me tê bikaranîn. Daxwazê jê bike ku bi cidî bê li ser xetê, heta ku êdî çekên kîmyawî li dijî gelê Kurd neyê bikaranîn. Mixabin berpirsan xwe firotine dewleta Tirk a dagirker. Li ber çavê wan çekên kîmyawî tê bikaranîn û li hember ti helwestê nîşan nadin. Ji ber ku weke bazirganekê nêzî gelê Kurd dibin.”
Li gorî bîlançoya HPG’ê ji 23’yê Nîsanê ve dewleta Tirk 323 caran çekên kîmyawî bi kar aniye û ji ber êrişan kîmyawî 38 gerîla şehîd bûne. Li herêma Behdînan jî ji ber çekên kîmyawî sivîl birîndar bûne.
(ab)
