Welatiyên parêzgeha Silêmaniyê ji ber êrişên dewleta Tirk a dagirker û rejima Îranê yên li ser xaka Başûrê Kurdistanê bi fikarin. Welatiyan daxwaz ji hikûmet û civaka navdewletî kirin li dijî êrişan helwestek zelal nîşandin.
Welatiyên sinorê parêzgeha Silêmaniyê ji ber êrişên dewleta Tirk û Îranê yên li ser xaka Başûrê Kurdistanê bi fikarin, welatiyan dan zanîn ti behaneyek ji êrişên her du dewletan re nayê qebûl kirin û divê pêşî li êrişan were girtin.
Welatiyê bi navê Edalet Mihemed yê ji bajarokê Dukan, diyar kir ku dewleta Tirk bi dehan sale sinorê xaka Kurdistanê derbas dike û ev yek binpêkirina yasayên navdewletiye. Edalet got; “Êrişên dijmin wê bi yên li ser çiyayan sinordar nemîne, dibe êrişên li ser bajaran jî destpêbikin. Pêwîste hikûmeta Herêma Kurdistan, hikûmeta Iraq û rêxistinên Neteweyên Yekbûyî li beramberî van êrişan bêdeng nemînin û helwest nîşandin.”
Welatiyê bi navê Mihemed Omer jî kiryarên dewleta Tirk şiband kiryarên rejima Baas û wiha got: “Bi salane bêy sedem zilm li Kurdan tê kirin. Tişta ku dewleta Tirk dike ji tişta ku rejima Baas dikir gelek xirabtire. Dewleta Tirk me topbaran dike û gazên kîmyawî li hemberî me bikartîne.”
Mihemed got ku dewleta Tirk bi behaneya şerê li dijî PKK’ê gelek caran çekên kîmyawî bikartîne û wiha domand: “Mane PKK jî Kurdin û ti ziyanek wê ji bo ti dewletekê çênebûye. Tenê parastinê li xaka Kurdistanê dikin. Pêwîste civak, bi taybetî jî hikûmeta Iraqê li beramberî van kiryarên dewleta Tirk bêdeng nebin û helwest nîşandin.”
Li ser heman mijarê welatiyê bi navê Kameran Şarbajêrî yê ji bajaroka Şarbajêr, di destpêkê de êrişên dewleta Tirk û Îranê şermezarkir û got: “Em wek xelkê bajaroka Şarbajêr êrişên dewleta Tirk û Îranê şermezar dikîn ku bi berdewam me topbaran dikin. Bêy ku ti sedemek hebe, welatiyên sivîl şehîd dixin, gundên me wêran dikin.”
Kameran da zanîn divê hikûmeta Herêma Kurdistan û Iraqê li dijî êriş û qetilkirina sivîlan helwestek cidî nîşan bidin. Kameran got, êrişên her du welatan (Tirkiye-Îran) dubarekirina dîroka rejima Baas a li beramberî Kurda ye.
(kş)
