Şîrovekarekî siyasî yê Iraqê ragihand ku bombebaran û êrişên dewleta Tirk nayê qebûlkirin, ji ber ku ziyanê digihîne nava Iraqê û got: “Divê hikûmeta Iraqê pêngavên cidî li beramberî êrişên Tirkiyeyê bavêje.”
Şîrovekarekî siyasî yê Iraqê Ebdula Kiyanî di derbarê êrişên dewleta Tirk ên li ser xaka Iraqê û Herêma Kurdistanê ji Rojnews’ê re ragihand ku bombebaranên dewleta Tirk û Îranê yên li ser Herêma Kurdistanê, ji aliyê hemû mezheb û neteweyên Iraqê ve nayê qebûlkirin.
Ebdula Kiyanî got: “Nabe ku bersiva hikûmeta Iraqê ya li beramberî êrişên dewleta Tirk ewqas hêsan be, divê tundtir û cidîtir be. Êrişên dewleta Tirk û Îranê nayên qebûlkirin, ji ber ku gelek ziyanê digihîne nava Iraqê. Ji bilî vê dibe sedema wêrankirina binesaziya Iraqê jî. Bê guman muxalefetek ya li dijî Îran û Tirkiyeyê di navxweyiya Iraqê de heye, lê ev ne hinceta bombebaran û destdirêjiya Îran û Tirkiyeyê ye. Divê ev pirsgirêk bi diyalog û têgihiştinek aştiyane werin çareserkirin.”
Ebdula Kiyanî di dewama axaftina xwe de qala hinceta bombebaranên Îran û Tirkiyeyê yên li ser xaka Iraqê kir û wiha axivî: “Wê demê Îran dikare bi hinceta muxalefetan Azerbeycanê bombebaran bike? Yan jî Tirkiye ma dikare muxalefetên li Qibris, Yewnan an jî li welatek din bombebaran bike? Bê guman nikarin. Dibe ku Sudanî piştî serdana xwe ya Îranê, li ser êrişên Tirkiye yên li ser Herêma Kurdistanê û Iraqê serdanan Tirkiyeyê jî bike.”
Hêjayî gotinê ye ku dewleta Tirk a dagirker ji Nîsana 2022’yan ve êrişek berfireh li ser xaka Herêma Kurdistanê destpêkiriye ku hîna berdewame. Ji bilî êrişên hewayî li dijî gerîla û xak Kurdistanê çekên kîmyawî û bombeyên qedexekirî bikartîne. Her wiha di şeva 19’ê Mijdarê de êrişek din a hemwext li ser Rojavayê Kurdistanê û Başûrê Kurdistanê da destpêkirin. Ji aliyek din ve rejîma Îranê xaka Herêma Kurdistanê bi tundî topbaran û bombebaran dike ku di encama êrişên her du aliyan de bi dehan welatî şehîd bûne û bi sedan kes jî birîndar bûne.
(fk)
