Çar roj in şerê li derdora girtîgeha Sînaa ya li taxa Xwêran a Hesekê didome. Hêzên Ewlekariya Hundirîn bi piştgiriya QSD`ê dor li girtîgehê girtine û banga xwe radestkirinê li çeteyan dikin. Heta niha gelek çeteyên ku çek rakiribûn, bi çekên xwe ve radestbûne.
Ev 4 roj li dû hev, şerên di navbera Hêzên Ewlekariya Hundirîn a bi piştgiriya Hêzên Sûriya Demokratîk (QSD) û çeteyên şaneyên DAIŞ`ê yên êrişkar de berdewam e.
Li gorî nûçeya ANHA’yê, Hêzên Ewlekariya Hundirîn bi piştgiriya QSD`ê derdora girtîgeha Sînaa kontrol kirine û dorpêça li ser çeteyan tengtir kirine.
Ji duh êvarê û heta vê sibê Hêzên Ewlekariya Hundirîn û QSD`ê bi rêya hoparloran bang li çeteyan dikin da ku xwe radest bikin. Li ser van bangan heta niha gelek çeteyên êrişkar ku hewl didan birevin bi çekan ve xwe radest kirine.
Niha QSD`ê pir bi baldarî û hesas nêzî çeteyan dibe, ji ber ku DAIŞ 700 zarokên “Eşbal El-Xîlafê” yên girêdayî xwe wek mertal bi kar tîne.
Hêjayî gotinê ye ev 700 zarok di hundirê girtîgehê de ji bo perwerdekirinê di hucreyên cûda de dihatin ragirtin.
