Di xwepêşandana girseyî ya li Silêmaniyê de gel bi yek dengî li dijî dagirkeriya Tirk bi dirûşmên “Bo derewe bo derewe, supay Tirk bo derewe” meşiyan. Di meşê de hat gotin, divê kolan vegerin qadên berxwedana li dijî dagirkeriyê û tev bi hevre li yek eniyê li dijî dagirkeriyê rawestin.
Di saetên êvarê de li bajarê Silêmaniyê meşek girseyî li dijî dagirkeriya dewleta Tirk ku ji aliyê 10 partî û rêxistinên sivîl, her wiha kesayetên serbixwe, rojnamevan û çalakvan ve hatibû organîzekirin, hat li darxistin.
Meşa ku ji cadeya Salim destpêkir heta ber Emnesoreya Silêmaniyê berdewam kir. Di meşê de girseya gel bi qêrîna dirûşman hêrsa xwe ya li dijî dagirkeriya Tirk nîşandan.
Di meşê de bê navber dirûşmên “Kurd im, qehremanim li dijî dagirkeranim”, “Ji bo Gare û Metîna heta dawiyê em ê şer bikin”, “Bo derewe bo derewe supay Tirk bo derewe”, “Bijî berxwedana gerîla û bimre xiyanet” hatin gotin.
Piştî girseya gel gihişt ber Emnesoreke li vir daxuyanî hatin dayîn.
Destpêkê li ser navê Navenda Karê Nîştimanî ku meş organîzekiribû, ji aliyê Luqman Hesen ve daxuyaniyek hat dayîn. Di daxuyaniyê de hat gotin; “Dewleta Tirk dixwaze hakimyeta xwe li ser herêmê bide ferzkirin. Di encama êrişan de bi sedan welatiyên sivîl şehîd bûne, xanî û baxên welatiyan rûxiyane û gelek gund vale bûne û li şuna wan çeteyên dewleta Tirk lê bi cih bûne.”
Her wiha bêdengiya Hikûmeta Herêmê ya li beramberî dagirkeriyê jî hat rexenekirin û hat gotin, hikûmeta Herêmê li dijî dagirkerî û êrişan bêdengî hilbijartiye, ji ber vê bêdengiyê dewleta Tirk dagirkeriya xwe zêdetir dike û welatiyên deverê koçber dibin.
Di dewama daxuyaniyê de hat diyarkirin ku divê kolan vegerin qadên berxwedana li dijî dagirkeriyê û tev bi hevre li yek eniyê li dijî dagirkeriyê rawestin.
Piştre daxuyaniya Hizba Zehmetkêşên Kurdistanê, Hizba Şuî ya Kurdistanê, Tevgera Azadî ya Komelgey Kurdistanê û Yekitiya Kominîstan hatin xwendin. Di daxuyaniyan de îşaret bi giringiya bihêzkirin û yekxistina helwestên dijî dagirkeriyê hat kirin. Her wiha daxwaz ji tevayî hizb û aliyên siyasî hat kirin bi hevre li dijî dagirkeriyê rabin.
Di dawiyê de jî Mamosta Tahir Seîd li dijî dagirkerî û talankirina xwezaya Kurdistanê helbestek xwend.
(kş)
