Îro di rûniştina dadgehê ya pênc girtiyên Şêladizê de eşkere bû ew di girtîgehê de bi lêdana boriyan, elektrîkê û şêwazên din êşkence lê hatine kirin. Her wiha hat gotin tevî ku girtî zimanê Erebî nizanin, lê îfadeyên wan bi zimanê Erebî hatine nivîsandin.
Nûnerê Rêxistina CPT ya Kurdistana Iraqê Kameran Osman ku ew jî îro di dema dadgehkirina pênc girtiyên Şêladizê de amadebû, derbarê rewşa girtiyan û naveroka rûniştina dadgehê de ji Rojnews re axivî.
Kameran Osman got, “Îro 20’emîn rûniştina dadgehkirina girtiyên Behdînanê pêkhat. Her yek ji Mehmud Nacî, Ehmed Yusif, Yusif Şerîf, Kovan Tariq û Nêçîr Bedîh hatin dadgehkirin.”
Derbarê naveroka rûniştina dadgehê jî Kameran Osman got, her pênc girtî bi tohmetên hewildan û avakirina komên çekdar, alîkariya bi PKK’ê re û organîzekirina xwepêşandanên şidetê li gorî madeya 1 a yasaya jimare 21 ya sala 2013’an a parlementoya Herêma Kurdistanê du sal cezayê girtîgehê lê hatine birîn.
Her 5 aktivîst 17 meh bûn hatibûn girtin, dadwer jî biryar da ku ew girtî bi şert werin berdan. Ji bo vê jî divê piştî mehek din her 5 girtî werin berdan.
Kameran Osman da zanîn her pênc girtiyan li pêşberî dadwer diyar kirin ku ew di girtîgehê de bi lêdana boriyan, elektrîkê, pêdakirina ava sar û gelek cûrên din hatine êşkencekirin.
Kameran Osman diyarkir îfadeyên hemû girtiyan bêy amadebûna parêzerên wan, bi zimanê Erebî hatine girtin û îmze bi girtiyan dane avêtin. Kameran got, her çiqas girtî Erebî nizanin, lê îfadeyên wan bi zimanê Erebî hatine nivîsandin û ji wan xwestine binê îfadeyên xwe îmze bikin.
(kş)
