Seroka Koma Tevgera Goran ya li Parlamentoya Herêma Kurdistanê Gulistan Seîd diyar kir ku divê Parlamentoya Herêma Kurdistanê bi fermî Rêveberiya Xweser a Bakur û Rojhilatê Sûriyeyê nas bike û got: “Rêveberiya xweser hemû pileyên xwe yên îdarî hene û kariye rêveberiyek serkeftî bimeşîne.”
Seroka Koma Tevgera Goran ya li Parlamentoya Herêma Kurdistanê Gulistan Seîd li ser mijara pêwîstiya Parlamentoya Herêma Kurdistanê Rêveberiya Xweser a Bakur û Rojhilatê Sûriyeyê bi fermî nas bike ji Rojnews’ê re axivî û got: “Hemû pileyên xwe îdarî di xwerêveberiya Bakur û Rojhilatê Sûriyeyê de heye, çi di warê çavkaniyên xwezayî, çi jî di warê rêveberinek rêkûpêk de. Weke ew ezmûna Rêveberiya Xweser ya me di nava çend salên borî de dîtiye, kariye rêveberine serkeftî bide meşandin.”
Gulistan Seîd diyar kir ku Rêveberiya Xweser kariye binesaziya aborî rêxistin bike û rewşa jiyana xelkê baştir bike û mafê hamê pêkhateyên cuda misoger bike û got: “Divê Kurd ji bo parçeyên din timî hevkar û hemaheng bin. Bi taybet divê Başûrê Kurdistanê piştgiriya beşên din ên Kurdistanê bike. Her weke di dema şerê Kobanê de Parlamenotya Herêma Kurdistanê biryar da pêşmerge bişîne, niha erkek ya Parlamentoya Kurdistanêye rêveberiya xweser nas bike.”
Gulistan Seîd eşkere kir ku divê ji bo bi fermî Rêveberiya Xweser a Bakur û Rojhilatê Sûriyeyê ji aliyê parlamentoyê ve were naskirin divê proje hebe û wiha domand: “Ev proje jî divê ji aliyê kesên taybet ve were nivîsandin. Ji bo piştgiriya tevahiya pêkhate û aliyên cuda yên Parlamentoyê bi dest bixe.”
(ab)
