Welatiyên navçeya Soran dan zanîn aliyek siyasî yê desthilata Herêma Kurdistanê ji bo bikare hebûna xwe li ser kursiyê desthilatê berdewam bike, hewara xwe gihandine dijminek wek dewleta Tirk. Welatiyan gotin, her aliyek hevkariya dewleta Tirk bike û siyaseta wê biparêze, wê di siberojê de ew alî bixwe bibe qurbanî.
Êrişên dewleta Tirk ên li ser xaka Başûrê Kurdistanê bi hemû dijwariya xwe didome. Li kêleka êrişan hevkariya PDK’ê ya bi dewleta Tirk re jî didome. Ev hevkariya PDK’ê ya bi dewleta Tirk re bûye cihê nerazîbûnek mezin a gelê Kurd, bi taybetî jî welatiyên Başûrê Kurdistanê.
Derbarê êrişên dewleta Tirk û hevkariya PDK’ê ya bi dijmin re welatiyên navçeya Soran ji ajansa me re axivîn.
Çalakvanê Siyasî Niyaz Balekî derbarê mijarê de wiha axivî: “Gelek caran şêwazek yê siyasetê tê meşandin ku siyaseta Kurd dikeve nav û haya wan jê nine. Ew jî ewe ku desthilat û hêzên siyasî ji bo bikare hebûna xwe li ser kursiyê desthilatê berdewam bike, hewara xwe digihînin dijmin. Lê her wextek ew dijmin bi serket, dibe dijminê rasteqîn ê wê hêza ku wê wek dostê xwe didît û piştgiriya wê dikir. Ew dijmin dawî li wê hizbê jî tîne.”
Niyaz Balekî hêvî xwest ku li her çar parçên Kurdistanê Kurd yekgirtina xwe çêkin û wiha domand: “Her wextek dijmin fersendê bibîne, wê dawî li hemû Kurdan bîne. Tirkiye bi eşkereyî dibêje ku di nava Kurdan de hêzek heye hevkariya wê dike ji bo êrişê ser xaka Kurdistanê bikin. Yên ku xwe wek dostê Tirkiye dihesibînin, bila bizanin ku wê di dema pêş de herî zêde ew zererê ji vê dostaniya li gel dijmin bibînin.”
Ciwanê bi navê Cuma Mistefa jî îşaret bi armanca êrişên dewleta Tirk kir û got: “Armanca Tirkiye ewe ku sinorên xwe yên coxrafî berfireh bike. Xaka Kurdistanê jî xakek dewlemend û berfirehe. Tirkiye çav berdayê û dixwaze xêr û bêra wê bidest bixe. Dixwaze bi behaneya PKK’ê xwe bigihîne sinorên di dema Osmaniyan de.”
Di dewamê de Cuma Mustefa da zanîn hin aliyên siyasî hene armanca wan ne nîştimanperweriye, tenê dixwazin li ser desthilatê bimînin. Cuma got: “Ji bo mana li ser desthilatê ev hêz hemû tiştî dikin û destê xwe jî didin destê dijminan. Xiyanet û sîxûrtiyê li Kurdên parçên din ên Kurdistanê dikin. Li vêderê her kesek parastinê li siyaseta dewleta Tirk bike, wê di siberojê de bixwe bibe qurbanî. Lê niha xak bûye qurbanî ne ew hêza ku bûye dost û hevkarê dewleta Tirk.”
(kş)
