Dewleta Îranê duh bi şev carek din bi dron û mûşekan êrişî baregehên partiyên Rojhilatê Kurdistan yên li Herêma Kurdistanê kir. Gorî agahiyan di encama êrişê de kesek jiyana xwe ji det daye.
Êrişên dewleta Tirk a dagirker û Îranê yên li ser Herêma Kurdistanê dewam dikin. Dewleta Îranê duh derengiya şevê di saet 12:20’an de carek din êrişî baregehên partiyên Rojhilatê kurdistan yên li Koye, Wargeha Cêjnîkan ya li nêzî Hewlêrî, baregeha Komeleya Zehmetkêşana Kurdistan ya li Zirguwêz a Silêmaniyê kir.
Dewleta Îranê destpêkê bi çar muşekan baregeha Hizba Demokrat ya Kurdistan a Îranê ya li Koyeyê bombekir. Di heman demê de baregehên Zehmetkêşana Kurdistan ya li herêma Zirgiwêz ya Silêmanî û Wargeha Cêjnîkan ya nêzî Hewlêrê ku penaberên xelkê Rojhilatê Kurdistanê têdene, bombekir.
Endamê Rêveberiya Hizba Demokrata Kurdistan ya Îranê Amanc Zêbayî derbarê êrişan de ji Rojnews re axivî û got; “Dewleta Îranê baregehên li Koye bombebaran kir, lê heya niha em nizanin çi ziyanek çêbûye.”
Li gorî agahiyên ji Komeleya Zehmetkêşan jî hatine standin, dewleta Îranê bi dronan êrişî herêma Bane Gewre ya li Zirgiwêz kiriye.
Gorî aghiyan dewleta Îranê bi du dronan êrişî wargeha Cêjnîkan jî kiriye û ji ber êrişê welatiyek jiyana xwe ji dest daye.
(nr)
