Ji ber astengî û êrişa asayîşê meşa dirêj a ciwanan ya ku wê ji Teq Teq heta Gare yê bihata lidarxistin, betal bû. Ciwanan diyarkirin ew ê bi rêbazên cûda cûda çalakiyên xwe yên li dijî siyaseta şerxwaz a PDK’ê bidomînin.
Ciwanên her çar parçeyên Kurdistan yên li Başûrê Kurdistanê bi daxuyaniyek nivîskî ragihandibûn ku ewê dijî siyaseta şerxwaz ya PDK’ê di 20’ê Mijdarê de berê xwe bidin Herêma Garê.
Bi dehan ciwan piştî saetên nîvro li bajarokê Teqteq ya ser bi navçeya Koye ya Hewlêrê kombûn û xwestin ber bi Herêma Garê ve bimeşin.
Lê Asayîşa Teqteq beriya ku meş destpê bike bi ser koma ciwanan de girtin û nehiştin ciwan bimeşin. Hêzên Asayîşê di heman demê de dest danîn ser kamêreya ajansa me Rojnews, ajansa ANF, televziyona Aryen Tv, Stêrk Tv û Nûçe Ciwan. Asayîşê nehêla rojnameger nêzî çalakiya ciwanan bibin.
Nûçegihanê ajansa me Botan Germiyanî ku dest bi ser kamereya wî de hate girtin, nêrînên rojnamevan û ciwanan ya li ser astengî û êrişa hêzên asayîşê wergirt.
Nûçegihanê Ajansa Nûçeyan a Firatê Hawrê Ferîdûn, diyarkir ku dema ku wê meşa ciwanan destpêbikira û wî çalakiyê dişopand, asayîşê dest bi ser kamera û kelûpelên wî yên rojnamevaniyê de girtin û got: “Hêzên asayîşê bi awayek pir xirab dest bi ser kelûpelên me de girtin. Heqaret li me kirin û gotin, heya berpirsê me ji nanxwarinê tê divê hun li bendê bimînin.”
Nûçegihanê kanala Aryen Tv Hawrê Karwan jî got; “Kiryarên ku hêzên asayîşê li beramberî rojnamevanan kirin, ji hemû pirensîbên şaristanyetê dûrin.”
Yek ji Endamên Komîta Amadekar a Meşê Bêrîtan Zagros jî têkildarî astengiya asayîşê got: “Ev nêzîkatiya asayîşa Teq Teq ji helwesta YNK’ê dûre. Divê asayîşê bi awayek gelek baş nêzî vê çalakiyê bibûya. Em ê wek ciwan têkoşîn û çalakiya xwe berdewam bikin. Îro li vir astengî li pêşiya me derxistin, lê di rojên pêş de li bajar û cihên cûda wê çalakiyên cûr bi cûr werin lidarxistin.
(kş)
