Kurdên derveyî welat li Strasbourgê ji bo biryara Dadgeha Mafê Mirovan ya Ewropayê ya derbarê Rêberê Gelê Kurd Abdullah Ocalan de ji aliyê Konseya Ewropa ve pêk were, çalakiya nobedê ya ji bo 17 rojan destpê kir. Çalakger bang li saziyê Ewropa kir ku zextê li Tirkiye bikin, ji bo biryara DMME’yê pêkbînin.
Desteya Wezîran ya Konseya Ewropayê, biryara Dadgeha Mafê Mirovan ya Ewropayê ya di sala 2014’an de derbarê cezayê girtîgehê yê heta hetayî ya têkildarî Rêberê Gelê Kurd Abdullah Ocalan de ku Tirkiye pêk ne anî, piştî heft salan xiste rojeva xwe.
Civîna li avahiya Konseya Ewropa ya li Strasbourgê 30’yê Mijdarê destpê kir û wê heya 2’yê Kanûnê berdewam bike.
Însiyatîfa ’Ji Ocalan re Azadî’ jî di çarçoveya pêngava ’Dem dema Azadiyê’ de û bi dirûşma,”Wê azadî serbikeve, ji bo Ocalan bikeve tevgerê” li ber avahiya konseyê çalakiyeke nobedê ya 17 rojî da destpêkirin.
Kurdistanî ji saetên sibehê ve li ber avahiya Konseya Ewropa kombûn û konê çalakiyê vedan. Ji bo roja yekemîn a çalakiyê komeke ji 100 çalakvanî pêktê, ji Siwîstreyê çalakiyê dewr girt. Pankartên wekî, ”Rêberê Gelê Kurd Birêz Abdullah Ocalan, ji 15’ê Sibata 1999’an ve li Îmraliyê girtiye, agahî jê nayê girtin” û bi 9 zimanan dirûşma, ”Wê azadî serbikeve” hatin vekirin. Her wiha çalakger posterên mezin ên Rêber Ocalan û nivîsên banga, ”Bikeve tevgerê” li saziyên Ewropa kirin, daliqandin.
Derbarê armanca çalakiyê de jî hevserokên Kongreya Civaka Demokratîk ya Siwîstreyê Selma Sûrer û Îsmaîl Kardaş, bi zimanê Kurdî û Tirkî daxuyanî xwendin. Di daxuyanî de ji bo bi dawî anîna bêdadiya li Îmraliyê bang li Konseya Ewropayê kirin ku biryara Dadgeha Mafê Mirovan a Ewropayê pêkbîne û her wiha balêkişandin ser êrîşên dewleta Tirk ên li dijî Başûrê Kurdistanê.
Çalakger piştî daxuyaniyê dirûşmên, ”Ji Ocalan re azadî”, ”Faşîst Tirkiye”, ”Kujer Erdogan” û ”Dewleta qirker a Tirk” gotin.
Piştî dirûşman çalakiyeke rûniştinê ya 10 deqîqeyî hate lidarxistin û paşê jî çalakger vegeriyan cihê ku kon vedane. Çalakiya li ber avahiya Konseya Ewropayê berdewam dike.
Çalakî wê her roj ji aliyê Kurdistaniyên li welatekî Ewropayê ve were dewir girtin û 17’ê Kanûnê bi dawî were.
Her wiha ji ber wê Serokkomarê Fransayê Emmanuel Macron 2’yê Kanûnê serdana Strasbourgê bike, rojek qedexeya çalakiyan hatiye ragihandin, wê çalakiya Kurdistaniyan jî rojek navber bikeviyê.
Çalakî wê 3’yê Kanûnê bi beşdarbûna endamên TEV-ÇAND’ê berdewam bike.
(bz)
