Derbarê êrişên dewleta Tirk û hevkariya PDK’ê ya li gel dewleta Tirk de, Çalakvanê Siyasî Hawrê Kastro da zanîn, dewleta Tirk devera dibin kontrola PDK’ê de wek yê xwe dihesibîne. Kastro got, “Dewleta Tirk dixwaze xaka Başûrê Kurdistanê bi giştî dagir bike. Ji bo pêşî li dagirkeriyê were girtin jî tişta herî baş yekitiya netewî ye.”
Çalakvanê Siyasî Hawrê Kastro derbarê hewildanên dagirkeriya Tirk ên li ser xaka Başûrê Kurdistanê de ji Rojnews re axivî û got: “Ji piştî raperînê ve hevkariya PDK’ê û dewleta Tirk a li gelhev berdewam dike. Ji ber Başûrê Kurdistanê di warê coxrafiya siyasî de di navbera PDK’ê û YNK’ê de dabeş bûye, dewleta Tirk sinorê dibin kontrola PDK’ê de wek yê xwe dihesibîne. Lê ji vê zêdetir dewleta Tirk dixwaze xaka Başûrê Kurdistanê bi giştî dagir bike.”
Di dewamê de Kastro da zanîn PDK û YNK ji bo ku Tirkiye û Îran piştgiriya wan a ji bo mana ser desthilatê bikin, hevkariyê li gel her du welatan dikin. Kastro got, ger Tirkiye û Îran hevkariya PDK’ê û YNK’ê neke, ew nikarin yek rojê hikumraniya Herêma Kurdistanê bikin.
Derbarê bê helwestî û hevkariya PDK’ê ya li gel dewleta Tirk, Çalakvanê Siyasî Hawrê Kastro got: “Mixabin gelê me dijminê xwe nas nake. Pênase û nirxandina me ya ji bo dijmin guheriye û zanyariyên me yên kur ji bo nasîna dijmin nine. Ev jî bûye sedem parçebûn di nava Kurdan de çêbe. Dijmin jî jivê parçebûna Kurdan sud werdigre.”
Hawrê Kastro yekitiya netewî wek tişta herî baş ji bo rûbirûbûna dijmin dibîne û got: “Yekdengiya nîştimanî bêy dadperweriya nîştimanî pêknayê. Kengî dadperweriya nîştimanî hebû, wê demê dê yekdengiya nîştimanî jî çêbe. Lê heta ku yekdengiya nîştimanî di nava aliyên siyasî yên Kurdî de nebe, wê nikaribin pêşî dagirkeriya dijminan bigrin.”
(kş)
