Çalakvanên jîngehê yên Soran dan zanîn ew ji ber talankirina xwezaya Kurdistan a ku li deverên sinorî yên Herêma Kurdistanê ji aliyê dewleta Tirk ve tê kirin bi fikarin. Çalakvanan daxwaz ji hikûmeta Herêmê kirin bi rêya konsolosxaneyên welatan kar li ser pêşîgirtina êrişên Tirkiye yên ji bo tinekirina çand û jîngeha Kurdistanê bikin.
Dewleta Tirk a talanker ji bilî ku gelek deverên Başûrê Kurdistanê dagirkiriye, li deverên dagirkirî jî dest bi talankirina xwezaya Kurdistanê kiriye. Rojane bi hezaran daran li nava xaka Kurdistanê de dibire, dibe Tirkiyeyê û difiroşe. Ev talana xwezayê jî li cem Kurdan bi taybetî jî jîngehparêzan fikarên mezin bi xwere aniye. Jîngehparêz daxwaz dikin gelê Kurd li dijî van kiryarên faşîst ên dewleta Tirk rabin û helwest nîşandin.
Serokê Borda Rêkxirawên Jîngehê ya Soran Hejar Mahîr derbarê mijarê de axivî û got, “Piraniya rêkxirawên jîngehê yên Kurdistanê serdana parlementoya Herêma Kurdistanê kirine û hikûmeta Herêmê jî ji kiryarên dewleta Tirk agahdar kirine. Her wiha daxwaznameyên xwe yên ji bo pêşîlêgirtina dar birîna li deverên sinorî pêşkêşî parlementoyê kirine. Bi vê armancê jî sala borî li ber parlementoya Herêma Kurdistanê çalakiyek nerazîbûnê hat lidarxistin.”
Hejar Mahîr da zanîn ambargoya ku ji aliyê welatên cîran ve bi taybet ji aliyê Tirkiye ve hatiye xistina ser Herêma Kurdistanê tenê di warê dagirkeriyê de sinordar nebûye û wiha domand: “Di heman demê de dar û daristanên Kurdistanê jî dibirin. Ev jî tinekirina jîngeha me ye. Tirkiye li ber çavê me daran dibire û dibe Tirkiyeyê û kesek jî helwest nîşan nade.”
Di dewamê de Hejar Mahîr daxwaz ji hikûmeta Herêma Kurdistanê kir ku bi rêya ofîsa peywendiyên derve ya Herêmê tevayî konsolosxaneyên welatan ji van binpêkirin û destdirêjiyên dewleta Tirk agahdar bike. Her wiha got wê rêkxirawên jîngehê alîkariya hikûmet û aliyên peywendîdar bin di gihandina dengên nerazî de li ser asta cîhanê daku pêşî li dewleta Tirk were girtin.
Çalakvanê Jîngehê Hisên Şêx Hecî jî da zanîn ew ji ber talankirina xwezaya Kurdistan a ji aliyê dewleta Tirk ve tê kirin gelek bifikarin û got, “Em ji van kiryarên Tirkiye bi fikar û bi hêrsin ku li ber çavên me dar û şitlên daristanên Kurdistanê dibire. Ev kezeba me birîndar dike. Ji berku em kar li ser jîngehê dikin û dizanin ev dar çend bi nirx û giringin ji bo mirovan.”
Hisên Şêx Hecî da zanîn dagirker tenê bi dagirkirina xakê ranawestin û wiha domand: “Dagirker jîngeh û çanda me jî dagir dikin. Ev yek jî pêwîstî bi yekdengî û helwestek hevgirtî heye. Pêwîste em hemû li dijî van kiryarên dijminkarane yên dewleta faşist a Tirk rabin û kar ji bo pêşîgirtinê bikin. Ger darek were birîn deh sal cihê wî nayê dagirtin. Niha li çiyayên Kurdistanê valatiya şînkatiyê çêbûye. Ji berku Tirkiye beşek mezin a daristanan biriye.”
(kş)
