Hat gotin, hin kelûpelên ku Amerîka ji Rojavayê Kurdistanê re dişîne, ji aliyê PDK’ê ve tên dizîn. Ji ber vê yekê jî di navbera fermandarê hêzên Amerîka yê li Herîrê û PDK’ê de alozî derketiye.
Kesayetê Siyasî Dilşad Mecîd li ser hesabê xwe yê Facebookê nivîsek belavkir û got, “Amerîka Weysî Barzanî (Kurê Mesûd Barzanî) û hêza wî bi dizîna kelûpelên leşkerî yên ku wê ji bo Rojava bihatan şandin sucdar dike. PDK vê yekê bi zextên dewleta Tirk dike.”
Di dewamê de Dilşad Mecîd dibêje, barên ku ji Hewlêrê ji bo Rojava tên şandin bi taybetî kelûpelên leşkerî, bi berdewam ji aliyê PDK’ê ve astengî jêre tên derxistin. Ji ber vê yekê gelek caran di navbera hêzên Amerîka û dijeterora PDK’ê de alozî derdikevin.
Dilşad Mecîd di dewamê de dibêje: “PDK dibin zextên dewleta Tirk de van karan dike. Di nava du hefteyên derbasbûyî de fermandarê hêzên Amerîka yê li Herîrê bi tûndî PDK’ê hişyar kiriye ku gelek barên ku ji kelûpelên leşkerî pêkdihat û wê ji bo Rojavayê Kurdistanê bihatan şandin, winda bûne. Fermandarê Amerîkayê ji PDK’ê xwestiye di zûtirîn dem de van kelûpelan vegerîne.”
Dilşad Mecîd eşkere dike ji ber van aloziyan binemala Barzanî daxwaza hevdîtinê li fermandarê hêzên Amerîka yê li Herîrê kiriye, lê heta niha hevdîtin pêknehatiye.
(kş)
