Serokê Komeleya Karkerên Mezopotamya Muslîm Kaplan bang li Yekîtiya Nîştimaniya Kurdistanê (YNK) kir ku pêşiya êrişên li wer welatiyên Bakurê Kurdistanê bigire û got: “Eger êriş berdewam bikin mafê wan e xwe biparêzin. Her roj gef li ser hevalên me hene.”
Li Kolana Bextiyarî ya Silêmaniyê welatiyê Bakurê Kurdistanê yê xwediyê Xwaringeha Deniz, Mihemed Zekî Çelebî şeva borî li ber xwargeha xwe ji aliyê du kesên li ser matorbiskilêtê ve hate gulebarankirin û giran birîndar bû.
Serokê Komeleya Karkerên Mezopotamya Muslîm Kaplan li ser Nexweşxaneya Şar a Silêmaniyê têkildarî êrişa li ser Mihemed Zekî Çelebî daxuyanî da. Gelek kes tevlî daxuyaniyê bûn.
‘Êriş terorîstîne’
Serokê Komeleya Karkerên Mezopotamya Muslîm Kaplan got: “Bi taybet em bang li YNK’ê dikin. Em weke xelkê Bakur, endamên HDP’ê, weke kesên sivîl li bajarê Silêmaniyê dijîn, lê êrişên li ser me tên kirin, li hemberî hevalên me tên kirin, ne êrişên yekem û duyemînin, ev cara sêyemîne li hemberî hevalên me êriş têne kirin. Ev êrişên terorîstî ne. Em bang dikin ku pêşî li van êrişan bigirin. Eger pêşî li êrişan neyê girtin weke însan mafê me yê xwe parastinê heye. Em neçarin mafê xwe yê parastinê bikar bînin. Eger em xwe neparêzin wê terorîst me qetil bikin.”
Banga ji bo YNK’ê
Kaplan ev bang li YNK’ê kir: “Em bang li YNK’ê dikin ku mêvanên xwe biparêze. Kesên ji Bakur ji ber zilma Tirkan hatîne vir biparêze. Di çanda Kurdan de jî heye, divê mirov mêvanê xwe biparêze. Em vê helwestê napejirînin. Ev cara sêyemîne li dijî hevalên me êriş pêk tên, lê helwestek tund nîşan nedane. Bi fermî helwestek nehatiye nîşandan.
Divê em xwedî helwestin. Kesên êrişî me dikin, ne tenê êrişî me dikin, êrişî qanûnên YNK’ê dikin. Êrişî qanûnên Herêma Kurdistanê dikin. Rêzdariya me ji qanûnên Herêma Kurdistanê re hene, em naxwazin derkevîn ji derveyî qanûnên Herêma Kurdistanê.”
‘Xeteriya li ser Çelebî didome’
Kaplan êrişa şeva borî bi bîr xist û wiha pêde çû: “Şevê din li dijî hevalê me Mihemed Çelebî êrişî terorîstî pêk hat. Heta niha jî êrişkar nediyarin. Kîne nayên zanîn. Em bang dikin ku bi lez ev terorîstane derkevin pêşberî dadgehê û bên dadgehkirin. Bi van êrişan dixwazin di nava me Kurdan de xerab bikin. Hîn xetere li ser jiyana Mihemed Çelebî heye. Heta niha du caran emeliyat bûye.
Em ê li hemberî êrişan li ber xwe bidin. Em fedayê welatê xwe ne û em ê berdêlan bidin. Me çek li djiî ti kesan bi kar neaniye. Lê îro li hemberî sivalan çekan bikar tînin. Em dubare bang l asayîşa Silêmaniyê û YNK’ê dikin ku pêşiya van êrişan bigirin û xwedî li erka xwe derkevin. Hevalên me yên li vir jiyan dikin bi dehan caran îstixbareta Tirkiyeyê li wan geriyaye û ji wan xwestine bibin sîxûrên wan. Bi êrişkirina li ser malbatên wan gef li wan xwarine ku bibin sîxûrên wan. Her roj gef li ser hevalên me hene.”
Serokê Komeleya Karkerên Mezopotamya Muslîm Kaplan destnîaşn kir ku li Dihokê jî welatiyek Bakurê Kurdistanê rastî êrişê hatiye.
Serokê Komeleya Karkerên Mezopotamya Muslîm Kaplan diyar kir ku li gorî wan êriş ji aliyê îstixbareta Tirkiyeyê ve pêk hatiye.
(ab)
