Çalakiya li ber dergehê Sêmalka ya ji bo wergirtina cenayê gerîlayan dewam dike. Şêniyên navçeya Tirbespiyê û hêzên parastina civakî yên herêma Cizîrê, bang li PDK’ê kirin da ku ji xeta îxanetê vegere û cenazeyên şehîd Tolhildan û şehîd Serdem radestî malbatên wan bike.
Çalakiya konê xwepêşandanê yê ji aliyê Meclisa Malbatên Şehîdan a herêma Cizîrê ve li qada dergehê Sêmalka tê birêxistinkirin, ji bo radestkirina cenazeyên gerîleyên di kemîna hêzên PDK’ê de şehîd bûne, di roja 9`emîn de didome.
Bi sedan şêniyên navçeya Tirbespiyê û hêzên parastina civakî (HPC) li qada çalakiyê kom bûn, wêneyên Rêberê Gelê Kurd Abdullah Ocalan û şehîdan rakirin û di nava tilîliyên dayikan û sloganên silavkirina berxwedana gerîla de, ber bi konê xwepêşandanê ve çûn.
Li wê derê, endama rêveberiya Hêzên Parastina Civakî-Jin (HPC-Jin) Hediye Ebdulah aixivî û bal kişand ser dîroka îxanetê ya PDK’ê. Hediye got: “PDK’ê ji destpêka damezrandina xwe ve û heta roja îro, xeta tesfiyekirina tevgerên Kurdî, kuştin û revandina kesayet û şoreşgerên Kurd esas girtiye. Ji ber vê yekê dîroka PDK`ê bi van sûcan dagirtî ye.”
Hediye bang li gelê Başûrê Kurdistanê kir ku li hemberî siyasetên PDK’ê serî hildin.
