Mamostayên Helebce girtina deriyên Sêmalka û El Welîd li dijî Rojavayê Kurdistanê weke xelekek din a plangeriya dijmin û dagirkeran dibînin û gotin ku divê Kurd li her cihî piştgiriya hev bikin, ne li dijî parçeyek din planên dijmin pêk bînin.
Di 16’ Kanuna 2021’an de çekdarên PDK’ê bêyî biryara parlamento û hikumeta Herêma Kurdistanê, deriyên Sêmalka û El Welîd li ser Rojavayê Kurdistanê girtin. Hîn derî nehatiye vekirin û ti liv û tevger li van deriyan. Nerazîbûna hemberî girtina roj bi roj zêde dibe. Di vê çarçoveyê de Mamostayên Peymangeha Hunerê Xweşik a Helebce ji Rojnews’ê re axivîn û girtina herdu deriyan şermezar kirin û weke karekî dijminkarî pênase kirin.
Mamostayê Peymangeha Hunerê Xweşik a Helebce Mihemed Hemeraza got: “Girtina deriyê Sêmalka xeleke din a ji wan planên dijmin û dagirkerên Kurdistanê yên li dijî gelê Kurd û bi taybet Rojavayê Kurdistanê pêk tînine. Sedema vê jî ewe ku Rojavayê Kurdistanê mînakek xweşik e, ne tenê li ser asta Kurd, belku li ser asta herêmê û Rojhilata Navîn mînakek xweşike. Lewma plangeriyek gelek ji vê berfirehtir li ser deriyê Sêmalka heye.”
Mihemed Hemeraza wiha domand: “Tevgera Azadîxwaz a Gelê Kurd li vir û li wir renga reng xebat û têkoşînê berdewam dike. Lê tişta ku xencara herî mezin li pişta vê tevgerê daye, nearamî û nakokiyên navxweyî bûn. Ev jî bi fitna dijminên gelê me bû. Niha jî bi heman awayî berdewam dike.”
Mihemed Hemeraza riya çareseriya pirsgirêkên Kurdan yekîtiya neteweyaî dibîne ku Rêber Ocalan dehan care ji bo bang dike û wiha domand: “Pêwîstiya me bi dawîanîna xalên lawaz heye ku dijmin li pişte xencerê li me dide. Ev jî tenê pêkanîna yekîtiya neteweyî ya Kurd a li ser astê her çar parçeyên Kurdistanê ye. Dema ku me dawî li xalên lawaz anî wê serkeftin ya me be. Şerme di sedsala 21’an de neteweyek li şûna piştgirî û hevkariya zarokên xwe yên li parçeyek din bike, derbê lê bide, nexşe û planên dijmin li ser pêk bîne.”
Li ser heman mijarê Mamosta Kawe Hesen jî got: “Girtina deriyê Sêmalka yê di navbera Rojavayê Kurdistanê û Başûrê Kurdistanê de ji cihê mixabiniyê ye. Bi dehan caran hikûmeta Baas ambargo didanî li ser me, me digot, dijminê Kurdane, êşa wê kêmtir dibû. Lê, vê carê beşek Kurd li dijî beşeke din ambargoyê çêdike. Ev êşek girane.”
Kawe Hesen, siyaseta girtina deriyan şermezar kir û wiha domand: “Em piştgiriya xebata Rojavayê Kurdistanê ya ji bo bidestxistina mafê xwe yên rewa dikin. Bi her awayî girtina deriyan binpêkirina mafê mirovane, bi taybet mafê zarok û sivîlan.
Kawe Hesen got ku divê gel bibe xwedî helwest û li her cihî Kurd piştgiriya hev bikin, neplanên dijmin li dijî hev bi cih bînin û diyar kir ku girtina deriyên Sêmalka û El Welîd xizmeta planên dewleta Tirk a dagirker dike.
(ab)
