Mamosta Êriş Omer yê ku di xwepêşandanên 2017’an de li Koyê ji aliyê hêzên ewlehiyê ve hatibû qetilkirin, di sêyemîn salvegera şehadeta xwe de hate bîranîn. Malbata Êriş diyarkir ji berku kurê wan ji ber azadî û mafê gelê xwe şehîd bû, ew ê heta dawiyê doza wî bişopînin. Her wiha hate gotin, sê sal derbasbûn lê hîna kujerên Mamosta Êriş nehatine girtin.
Di saetên êvarê de li navçeya Ranyayê bi tevlibûna malbat, çalakvan û gelek welatiyan Mamosta Êriş Omer yê ku di xwepêşandanên 2017’an de li Koyê ji aliyê hêzên ewlehiyê ve hatibû kuştin, li ser gora xwe bi merasîmek hate bîranîn.
Merasîmê bi deqek rêzgirtina ji bo şehîdan destpêkir. Piştre li ser navê komîta amadekar a merasîmê, malbata Mamosta Êriş, malbata Rojnamevan Serdeşt Osman, malbatên şehîdên xwepêşandanên 2011’an peyam hatin dayîn.
Di peyaman de hate gotin, “Daxwazên ku Mamosta Êriş û hevalên xwe ji ber giyanê xwe fedakirin, hîna nehatine bicihanîn. Li şûna desthilat daxwazên gel bicih bîne û kujeran ceza bike, berovajî tevdigere. Di rojên derbasbûyî de jî li Herêma Kurdistanê gelek kes di xwepêşandanan de hatin kuştin.”
Her wiha hate gotin, Mamosta Êriş ji ber azadî û mafê gelê xwe şehîd bû, ew ê heta dawiyê doza wî bişopînin. Hate gotin, sê sal derbasbûn lê hîna kujerên Mamosta Êriş nehatine girtin û ji aliyê hizbên desthilatê ve tên parastin.
Piştî axaftinan xelata sêyemîn salvegera şehîdbûna Mamosta Êriş pêşkêşî Hoşmend Salih hate kirin ku bixwe kesek astengdare û wî jî wek çalakvan sala 2017’an cihê xwe di nava xwepêşandanan de girtibû. Di dema xelat wergirtinê de Hoşmend Salih got; “Wek kesek astengdar ez ê rêbaza Mamosta Êriş berdewam kim, ji berku ji bo nan û azadiyê li dijî bê edaletiyê giyanê xwe fedakir.”
Piştre şitlên daran hatin çandin û merasîm bi dawî hat.
Mamosta Êriş Omer di 28’ê Kanuna 2017’an de li navçeya Koyê di dema xwepêşandanan de ji aliyê hêzên ewlehiyê ve hatibû qetilkirin.
(kş)
