Mamostayên Zanîngehê dan zanîn hevkarî kirina dagirkeran xiyanete li beramberî gelê Kurd û xaka Kurdistanê. Her wiha gotin, bê planiya desthilatê û dijminahiya navxweyî wisan kiriye ku dijmin li dijî gelê Kurd komployan bike.
Mamostayên Zanîngeha Selahedîn û Zanîngeha Silêmaniyê di derbarê êrişên dewleta Tirk ên li ser xaka Başûr û hevkariya PDK’ê ya bi dewleta Tirk re ji Rojnews re axivîn.
Mamostayê Zanîngeha Selahedîn Sabir Ebdulrehman, da zanîn dewleta Tirk ji hemû aliyan ve dagirkeriyê li ser xaka Kurdistanê dike, lê wê di êrişên li ser Kurdistanê de bi sernekeve.
Derbarê xiyaneta navxweyî de jî Sabir Ebdulrehman got: “Her aliyek Kurdî hevkariya hêzên dagirkeriya Tirk bikin, li beramberî gelê Kurd û xaka Kurdistanê xiyanetê dikin.”
Di dewamê de Sabir Ebdulrehman destnîşan kir ji ber şerê Kurd bi Kurd dîrokek bi êş ya gelê Kurd heye û wiha domand: “Nabe ti aliyek Kurdî hevkariya dewleta Tirk bike. Divê hemû aliyên Kurdî li dijî êriş û dagirkeriya Tirk a li ser xaka Kurdistanê xwedî bernameyek hevpar bin.”
Derbarê mijarê de Mamostayê Zanîngeha Silêmaniyê Bextiyar Kemal Talebanî jî da zanîn; “Nabe ji ber çend kes yan jî aliyek siyasî çarenûsa gelê Kurd bikeve di jêr metirsiyê de. Ji bona wê divê aliyên siyasî berjewendiyên xwe bidin aliyekê û destpêkê çarenûsa gelê Kurd bi fikirin. Li beramberî dijmin şoreşa Kurdayetî xurtir bikin.”
Bextiyar Kemal Talebanî komployên dagirkeran ên li dijî gelê Kurd bi bê planiya desthilata Herêma Kurdistanê û dijminahiya navxwe ya Kurdan ve girêda û wiha dawî li axaftina xwe anî; “Divê desthilata Herêmê ji bo rêvebirina Kurdistanê û jiyana gelê Kurdistanê xwedî plan û bername bin. Ji ber dema di rêvebirinê de plan nebe, dijminên Kurdan planan li dijî gelê Kurd û xaka Kurdistanê datînin.”
(kş)
