Tevî astengiyan jî mamosteyên dersdar yên herêma Çoman a ser bi Hewlêrê mîna bajarên din ên Herêma Kurdistanê bi daxwaza tayînkirinê û bidestxistina heqdesta xwe daketin qadan.
Piştî parêzgeha Silêmanî mamosteyên Dersdar yên Hewlêrê jî bi daxwazkirina tayînkirina daîmî daketin qadan.
Mamosteyên dersdar yên navçeya Çoman a ser bi Hewlêrê li Parka Derwaze ya Çomanê heya perwerdeya Çomanê meşiyan.
Mamosteyê dersar Ziyad Kerîm diyar kir li Hacî Omeran, Simîlan, Gelale, Qesrê û Çomanê nêzêi 400-500 mamosteyên dersdar hene û hefteyeke boykota kar kirine. Ziyad Kerîm dazanîn ew dixwazin yan weke mamosteyên din werin tayînkirin anjî weke mamosteyên bi peyman xebitin.
PDK ji bo pêşî li xwepêşandana mamosteyên dersdar bigire ji gelek herêmên din hêzên leşkerî anî Çomanê lê nekarî asteng bike û Rêveberê Perwerdeya Çomanê neçar ma guh bide daxwazên wan.
Zêdeyî hefteyeke mamosteyên dersdar yên herêma SilêmanÎ, Helebce, Raperîn, Germiyan boykota kar kirine û li qadanin. Îro jî li gelek deveran çalakiyên mamosteyên dersdar birêve çûn.
