Nexweşiyên tebeq, zerik û çend xweşiyên din qira ajalan tîne û xwediyê ajalan diyar kirin ku hikûmet alîkariya wan nake û agahiya wê ji rewşa wan nîne.
Li herêma îdareya Soran gelek ajal ji ber xweşiyên tebeq (FMD), zarkolî, zerek û hinek xweşiyên din mirîne û gelek zerer li xwediyê ajalan bûye.
Şêniyê gundê Bênuryanî yê ser bi Rewandizê ya Îdareya Soran Resûl Ebdullah zêdetirî 40 bizin û kerikên wî mirîne û got: “Rojane çend jê dimirin û hikûmet alîkariya me nake. Belku qet agahiya wê ji lawirvanan nîne. Nexweşî zêdetir tebeqe û di vê demsalê de zêdetir berê ajalê me vê nexweşiyê digire. Ev jî dibe sedema tinebûna wan. Ji ber ziyanek mezin li me bûye. Eger rewş wiha berdewam bike, wê hinek din jî bimirin û ziyan jî zêdetir bibe.”
Li ser vê nexweşiyê, Veterinar Nebez Tahîr diyar kir ku nexweşiya tebeqê bi dermanek diyarkirî çareser nabe got: “Çend cur derman didin ajalan. Pêwîst dibînin ji berî nexweş bikevin, xwediyê ajalan parastina ajalên xwe bikin û rê nedin tûşî van curê vîrûsan bibin. Ev nexweşî, vîrûsekî kuştinê ye û ji sedê 50’iyê ajalan tine dike. Ango eger li gundekê 100 ajal vê nexweşiyê bigirin, herî kêm 40 heta 50 jê dimirin.”
Nebez Tahîr wiha domand: “Li vê herêmê girtina ajalan a vê vîrûsê peywendî bi curê ax, av û hewayê ve heye ku zêdetir herêmek çiyayî û dijware. Herwiha hawirdekirina ajalên qaçax jî sedema girtina vê vîrûsê ye, ji ber ku bêyî kontrol derbasî xaka Herêma Kurdistanê dikin.”
Veterinar Nebez Tahîr rojane serdana gundan dike û ajalên nexweş ketine derman dike. Li gundên Soran bizin û mih vê nexweşiyê digirin. Yên temenê van biçûke xwe li ber nagirin û dimirin.
Nexweşiya tebeq (FMD) nexweşiyek vîrûsiye û ajalan digire. Li jêra simê ajalan birîndar dike. Ji ber kulek dibin. Li gorî lêkolînan nexweşiya tebeq nexweşiya herî zû di nava ajalan de belav dibe ye.
Li gorî daneyan li Herêma Kurdistanê zêdetirî 6 milyon ajalên biçûk û mezin hene. Berê hikûmeta Herêma Kurdistanê ajal aşî dikirin, lê ev çend salin hikûmeta Herêma Kurdistanê dest ji aşikirina ajalan berdaye. Ev jî dibe sedem ku di nava ajalan de nexweşiyên vîrûsî zêde bibin.
(ab)
