Hevseroka Nûnertiya HDP’ê ya Herêma Kurdistanê Nahîde Ermîş li ser qetilkirina welatparêzê ji Bakurê Kurdistanê û xwediyê restoranta Denîz Mihemed Zekî Çelebî diyar kir, eger YNK naxwaze bûyerên bi vî awayî li herêmê rû bidin, divê kujerên bigirin û ceza bikin.
Şeva 17’ê Gûlanê welatparêzê ji Bakurê Kurdistanê û her wiha xwediyê restoranta Denîz Mihemed Zekî Çelebî nêzî cihê kar rastî êrîşeke çekdarî hat. Roja 18’ê Gulanê jî ji ber giraniya birîna xwe li nexweşxaneya Şar a Silêmaniyê jiyana xwe ji dest da. Tevî 3 roj li ser bûyerê re derbas bûye jî heya niha hêzên ewlekariyê yên Silêmaniyê derbarê bûyerê de ti daxuyaniyek nedane. Tevî Nûnertiya HDP’ê û Komeleya Mezopotamya dibêjin, êrîş siyasiye û ji aliyê dewleta Tirk ve hatiye kirin jî, asayîş dibêje, ew bi mijarê re eleqeder nabin, dosya li gel Rêveberiya Polîsên Silêmaniyê ye!
Hevseroka Nûnertiya HDP’ê Nahîde Ermîş li ser mijarê ji ajansa me re axivî û ji bo parastina ewlekariya welatparêzên ji Bakurê Kurdistanê bang li rêveberiya Silêmaniyê û hêzên ewlekariyê kir.
Ermîş ku êrîş weke êrîşeke dewleta Tirk pênase kir, li gel şermezarkirinê dazanîn ev êrîş ji êrîşên dewleta Tirk ên li ser Kurdan qut nîne.
Ermîş diyar kir ev bi mehane metirsî li ser jiyana endamên wan heye û got: “Dewleta Tirk li çar parçeyên Kurdistanê êrîşî Kurdan dike. Armanca van êrîşan şikandina îradeya gel Kurd û berxwedana wê ye. Lê berxwedan û serkeftinên Kurdan dewam dike û wê ti êrîşek jî nekare vêya bide sekinandin.”
Nûnera HDP’ê ya li Başûr Nahîde Ermîş ji rayedarên YNK’ê jî xwest lêkolîneke berfireh li ser bûyerê bikin û got: “Divê tawanbar bên peydakirin û cezakirin. Eger kujer neyên peydakirin, eşkerekirin û cezakirin , dibe ku sibe li cihekî din heman kiryarên terorîstî beramber endamên HDP’ê pêkbên.”
Ermîş dazanîn ev kujerane bêyî piştgirî nikarin êrîşên bi vî awayî pêkbînin û lewma ji bo dûbare nebûna van êrîşan bang li YNK’ê kir kujeran bigire û ceza bike.
(bz)
