Navenda Lêkolînên Jineolojiyê di derbarê ezmuna jinên hunermend û rola zanista jineolojiyê de panelek da. Hate gotin ku jin dikarin bi rêya hunerê pirsgirêkan çareserkin.
Piştî saetên nîvro li navenda Kurdolojî ya li Silêmaniyê ji aliyê Navenda Lêkolînên Jineolojiyê ve panelek li ser ezmûna jinên hunermend hate pêşkêşkirin. Di panelê de gelek jinên çalakvan, hunermend û welatî amade bûn.
Di destpêka panelê de li ser kar, xebat û armanca jineolojiyê sinevîzyonek hate nîşandan.
Piştre Hunermend û Mamostaya Peymangeha Hunerên Xweşik a Silêmaniyê Rojgar Mistefa di derbarê huner û rola wê de axivî Rojgar Mistefa qala hinek berhemên xwe kir û diyarkir bi rêya hunerê ew dikarin pirsgirêkan çareser bikin.
Rojgar Mistefa da zanîn hunermend ji pirsgirêkên rojane di nava civakê de rû didin ne dûrin, dikarin rewşa jinan û rewşa hunerê biguherînin.
Piştre Hunermend û Rojnamevan Zehra Dogan jî di derbarê huner û nasnameyê de gotarek pêşkêş kir. Zehra da zanîn divê jin bi awayek komînal li ser zanista jineolojiyê bixebitin û di warê huner û aliyên din ên jiyanê de reng bidin jiyanê.
Piştre Endama Akademiya Jineolojiyê û Nivîskara Govara Jineolojî Nagîhan Akarsel jî gotarek li ser rola jineolojî ya di hunerê de pêşkêşkir. Nagîhan da zanîn jineolojî zanista lêgerîna jinê ya ji bo çawaniya jiyankirinek raste. Her wiha got, huner û zanist jî du tiştên biheve girêdayîne.
Di dawiya panelê de, xwediya Galerî Ahu Hunermend Mahabat Cemal peykerê logoya Jîneolojî diyarî panelîstan kir.
(kş)
