Parlamenter ê Herêma Kurdistanê Luqman Werdî diyar kir ku girtina Deriyê Sêmalka li dijî yekrêzî û yekîtiya neteweyî ye û got ku divê demildest Deriyê Sêmalka were vekirin.
Di 16’ Kanuna 2021’an de çekdarên PDK’ê bêyî biryara parlamento û hikumeta Herêma Kurdistanê, deriyên Sêmalka û El Welîd li ser Rojavayê Kurdistanê girtin. Hîn derî nehatiye vekirin û ti liv û tevger li van deriyan nîne.
Parlamenter ê Herêma Kurdistanê Luqman Werdî li ser mijarê ji Rojnews’ê re axivî û got: “Girtina Deriyê Sêmalka biryarek siyasî ye. Ji ber ku hikûmeta Herêma Kurdistanê bi fermî girtina derî ranegihandiye.”
Werdî diyar kir ku girtina derî karek şaşe û wiha domand:” Girtina vî derî karekî gelek şaşe û neraste. Ji ber ku yekane deriyê Başûrê Kurdistanê yê li gel Rojavayê Kurdistanê ye. Herwiha yekane rê ye bikarîn alîkariya Rojavayê Kurdistanê bikin.”
Parlamenter ê Herêma Kurdistanê Luqman Werdî destnîşan kir ku divê hikûmeta Herêma Kurdistanê demildest Deriyê Sêmalka ji bo Rojavayê Kurdistanê veke û wiha pêde çû: “Pêwîstiya jiyan û rewşa xelkê Rojavayê Kurdistanê bi vî derî heye. Nabe xelkê Rojavayê Kurdistanê bikin qurbanê nakokiyên siyasî. Girtina vî derî xizmeta yekrêzî û yekîtiya neteweyî nake. Ti sedem û hîncetek ji bo girtina derî nîne. Lewma divê demildest derî were vekirin. Ji ber ku li gel Rojavayê Kurdistanê ji bo peywendiyên civakî, veguhestina bazirganî û pêwîstiyênrojane yên xelkê û amûrên tenduristiyê ye û nabe were girtin.”
(ab)
