Partiya Demokrata Kurdistanê (PDK) ciwanên ku di 2019’an li dijî baregeha artêşa Tirk a li Şêladiz raperîn kirin û ketin baregehê ceza dike. Di 18’ê Mijdarê de ji wan ciwanan 5 ciwan bi salekê cezayê girtîgehê hatin cezakirin û biryare ku di nava çend rojên din de 5 ciwanên din jî dadgeh bike.
Di 23’yê Çileya 2019’an de li navçeya Şêladiz a dikeve Herêma Behdînanê, ji ber bombebarana artêşa Tirk a dagirker 4 welatiyên sivîl jiyana xwe ji dest dan û 2 jî birîndar bûn. Pişî êrişê, xelkê Şêladizê di 26’ê Çile de rabû ser xwe û dest bi raperînê kirin. Xelkê Şêladizê bi meşê ketin nava baregehên dewleta Tirk a dagirker. Welatiyan baregeh, çek, kel û pelên leşkerên Tirk şewitandin. Leşkerên dewleta Tirk a dagirker di nava baregeha Başûrê Kurdistanê de, êrişî welatiyan kir. Di encama êrişê de 2 welatiyan jiyana xwe ji dest dan û gelek kes jî birîndar bûn. Vê raperîna xelkê Şêladizê tirs xistîbû dilê PDK’ê û artêşa Tirk. Hîn PDK tola wê distîne.
Li gorî agahiyên bi dest ketine, di 18’ê Mijdarê de 5 ciwanên ku berî 2 salan tevlî raperîna Şêladizê ya li dijî Artêşa Tirk bûne ji aliyê Dadgeha Dihokê ve bi salekê hatine cezakirin.
Çavkaniya ku agahî dane Rojnews’ê ku ji ber ewlehiyê nexwest navî were parvekirin, diyar kir ku 5 ciwan bêyî agahdarkirina pêşwext û diyarkirina dema rûniştina dadgehê, hêzên ewlehiyê li ser mala wan de girtine, birîne dadgehê û ceza kirine.
Li gorî agahiyan wê di rojên pêş de 5 ciwan bi heman hînceta tevlî raperînê bûne werein dadgehkirin .
