Nivîskar û rewşenbîrên Germiyan diyarkirin ku bêdengiya Iraq û alîkarî dayîna PDK’ê ya ji bo dewleta Tirk, sedema êrişên dewleta Tirk yên ser Herêma Kurdistanê ne û gotin; “Pêşeroja me di metirsiyê deye, divê em dijî dagirkeriyê xwedî helwest bin.”
Êrişên dewleta Tirk a dagirker yên li ser Başûr û Rojavayê Kurdistanê bê navber dewam dikin. Dewleta Tirk rojane xelkê sivîl dike hedef û komkujiyan pêktîne. Tevî hemû bangan jî Hikumeta Iraq, Herêma Kurdistan û welatên cîhanê bêdengiya xwe ya dijî dagirkeriyê diparêzin. Derbarê êrişên dewleta dagirker de, rewşenbîr û nivîskarên Herêma Germiyan ji Rojnews re axivîn.
Destpêkê nivîskar Simko Sabir da zanîn ku bi salane welatên dagirker du diliyê di suc û komkujiyan de nakin û wiha axivî; “Her yek ji wan welatan bi şêwazek cûda êrişî Kurdan dikin û komkujiyan pêktînin. Bi taybet dewleta Tirk a dagirker ji bo Kurdan, ti hêviya xwe bi aştî û danustandinan naîne. Ji bo vê armanca êrişên dewleta Tirk ên ji bo gelê Kurd, gelek tirsnake û dixwazin me tine bikin.”
Nivîskar Simko di dewama axaftina xwe de desnîşankir ku Kurd li kuderê bin, dewleta Tirk hewla tinekirina wan dide û wiha pêde çû; “Bi taybet demên dawî de li Rojavayê Kurdistanê komkujiyan pêktîne, Başûrê Kurdistanê jî bê navber bombebaran dike. Îran jî dest bi topbarankirina xelkê Kurdistan kiriye, niha pêşeroja me di metirsiyê deye, divê em dijî dagirkeriyê xwedî helwest bin.”
Li ser heman mijarê rewşenbîr Umer Mihemed Salih jî axivî, Mihemed Salih êrişên dewleta Tirk bi nêzîkbûna hilbijartinan ve girêda û wiha got; “Partiyên netewperest ên Tirk, AKP-MHP ji ber ku hilbijartinên Tirkiyeyê nêz dibin, êrişî Kurdan dikin. Ev êriş jî ji bo hestên netewperestên Tirk bilind bike pêktînin. Sedemek din ya êrişan bêdengiya Hikumeta Iraq û alîkarî dayîna PDK’ê ya ji bo dewleta Tirk e. Ji ber ku zextek zêde ya welatan li ser Îran heye û Îran dixwaz pirsgirêkên xwe yên navxweyî derbixe derve, êrişî partiyên Rojhilat yên li Herêma Kurdistanê dike.”
Umer Mihemed Salih di dawiya axaftina xwe de dibêje; “Pêwîstiya gelê Kurd bi yekîtî û yekdengiyê heye. Ji bo vê jî xebat were kirin û ger qurbanî jî werin dayîn, divê Kurd pêşeroja xwe diyar bikin.”
(nr)
