BIRWA ESED / ROJNEWS
Pêşmergeyên Dêrîn ên Herêma Kurdistanê diyar kirin ku her hêzekî li gel êrişên dewleta Tirk a dagirker be, ji dijmin xerabtire , ne kurde û ne jî hestên Kurdîtiyê heye û gotin: “Çawa berê li dijî dijminê welatê me, me şer kir, niha jî amadene li hemberî her dagirkeriyê rabîn.”
Berpirs û endamên Komeleya Pêşmergeyên Dêrîn ên Herêma Kurdistanê têkildarî êrişên dewleta Tirk a dagirker ên li ser Başûrê Kurdistanê û hevkariya PDK’ê ji Rojnews’ê re axivîn û helwesta xwe anîn ziman.
Cîgirê Serokê Şaxê Komeleya Pêşmergeyên Dêrîn a Silêmaniyê Hemereşîd Qeredaxî diyar kir ku weke pêşmergeyên dêrîn hemû destdirêjiyên li ser xaka Kurdistanê û leşkerkêşiyê şermezar dikin û got: “Ev çend salin artêşa Tirk û Îranê sînorên Herêma Kurdistanê derbas dikin û bi hînceta hebûna gerîlayên PKK’ê, Komele û Demokrat tên li ser xaka welatê me. Ev jî destwerdane û gavek metirsîdare. Herêma Kurdistanê serbixwebûna xwe heye. Nabe dewleta Tirk bê rez û baxçeyên Kurdistanê tine bike û ziyanê bide welatî û welatê me.”
‘Pêşiya êrişan bigirin û qebûl nekin’
Cîgirê Serokê Şaxê Komeleya Pêşmergeyên Dêrîn a Silêmaniyê Hemereşîd Qeredaxî ji hemû hêzên Kurdistanê xwest ku pêşiya êrişan bigirin û qebûl nekin û diyar kir ku ji ber ku karê ku dewleta Tirk li dijî Herêma Kurdistanê dike metirsîdar e.
Herwiha Berpirsê Şaxê Komeleya Pêşmergeyên Dêrîn a Kerkûkê Îbrahîm Mihemed têkildarî êrişên dewleta Tirk ên li ser xaka Herêma Kurdistanê got: “Em weke pêşmergeyên dêrîn ên Kurdistanê li ser êrişên dewleta Tirk ên li ser Herêma Kurdistanê gelek bifikar in û karek gelek qirêj û nerawaye li dijî miletê me dike. Her kesê ku êrişên Tirkiyeyê yên li ser Herêma Kurdistanê baş bibîne, ew ne Kurde û ne jî hestên Kurdîtiyê heye.”
‘Em ê li dijî êrişên Tirkiyeyê derkevîn’
Îbrahîm Mihemed wiha domand: “Em ê li dijî êrişên Tirkiyeyê derkevîn. Ji ber ku me hemû temenê de di şerê ji bo vî welatî de derbas kir. Niha jî bi enerjiya di laşê me de maye, amadene li hemberî hemû dagirkeriyê derkevîn.”
‘Tirkiye çav berdaye neft û gaza Kurdistanê’
Pêşmergeyê Dêrîn ê li Helebce Mam Feyruz jî wiha axivî: “Tirkiye ji hemû dijminan xerabtire û yên hevkariya wê jî dike, ji wê xerabtire. Armanca Tirkiyeyê dagirkeriye û bi gaz û neftê re birina xezîneya Kurdistanê ye. Eger hêzên ku hevkariya dijmin dikin, bila hevkariya birayên xwe yên Kurd bin ji ya dijmin baştire. Tirkiye çav berdaye neft û gaza Kurdistanê. Eger hikûmeta Iraq û Herêma Kurdistanê dengê xwe dernebin wê Tirkiye biçe Çemçemal.”
Mam Feyruz wiha domand: “Eger em bi xwe jî jêre pêşengiyê nedin wê nekare were. Ez bi xwe li dijî vê me. Hêvîdarim ku PDK pişta birayên xwe yên Kurd bigire û piştgiriya dijmin neke.”
(ab)
