Şemî, 20 Pûşper 2020 – 07:35 SILÊMANÎ/ROJNEWS
Bomberdûman û êrîşên dewleta Tirk ên li ser xaka Başûrê Kurdistanê berdewam dikin. Li dijî êrîşên dagirkeriyê welatiyên Herêma Kurdistanê yên bi bertek in gotin ku pêwîst e bêdengî bê şikandin, eger hikûmet nikare welêt bi rê ve bibe, bila kursiyê desthilatdariyê terk bike.
Mamostayên zanîngehê û çalakvanên civaka sivîl ên bajarê Silêmaniyê têkildarî êrîş û dagirkeriya dewleta Tirk ji Rojnews re axivîn.
‘Desthilatdariyeke xwedî li kerameta mirovan derkeve nemaye’
Mamostayê Zanîngeha Silêmanî Kamîl Umer ê bi awayekî bi fikar û bêhêvî behsa helwesta hikûmeta Herêma Kurdistanê dike got, “Desthilatdariyeke me ya siyasî ya karibe xwedî li xak, nirx û kerameta mirovên Herêma Kurdistanê derkeve nemaye. Lewma dewleta Tirk bi zanebûna ku hikûmraniyeke nikare desthilatdariyê bike li Herêma Kurdistanê heye êrîş dike û xelkê qetil dike.”
Mamosta Kamîl bal kişand ku belavbûna vîrusa Koronayê li ser welatiyan metirsiyeke, lê bêdengiya li dijî destdirêjiyan malwêraniyê zêdetir dike û wiha dewam kir, “Pêwîst e bêdengî bê şikandin û eger hikûmet nikare welêt bi rê ve bibe, bila kursiyê desthilatdariyê terk bike, meydanê ji bo hêzên din vala bike.”
‘Stratejiya wan jiholêrakirina destketiyên gelê Kurd e’
Endama Partiya Kesk a Kurdistanê Fewziye Ebdulkerîm jî anî ziman ku stratejiya Erdogan û artêşa Tirk dagirkirina xaka Herêma Kurdistanê, jiholêrakirina destketiyên gelê Kurd e û wiha axivî: “Lê belê weke em dibînin, ne hikûmet ne jî gel hest bi vê metirsiyê nake.”
Fewziye îşaret bi nerazîbûnên li dijî dagirkeriyê kir û got, “Divê li tevahî bajaran gel dengê xwe bike yek. Tê xwestin ku siyaset û plangeriya dewleta Osmanî li ser gelê Başûrê Kurdistanê bê meşandin. Divê gelê me rê li ber vê metirsiya niha û di pêşerojê de wê pêre rûbirû were bigire.”
‘Bêdengî cihê fikaran e’
Endamê Koma Wijdan Dilşad Mîranî destnîşan kir ku ji dîroka dewleta Tirk a dagirker diyar e bê çi armanc dike û wiha got, “Lê belê bêhelwestî û bêdengiya hikûmeta Herêma Kurdistanê û ya Iraqê ji bo welatiyan cihê êş û fikaran e. Tenê ev nîne, pêkan e niha bûne hevkarên êrîşên dewleta Tirk û pêre xwedî heman helwest in. Em daxwaz dikin ku di parlamentoyê de di navbera eniya balpiştiya ji êrîşan re û eniya li dijî êrîşan de yekê hilbijêrin.”
(yş)
