Şandeya Navnetewî ya ji bo Aştî û Azadiya Kurdistanê serdana malbata ku par li gundê Kune Masî ya ser bi Şarbajêra Silêmaniyê bibû hedefa bombebaran dewleta Tirk kir û ji nêz ve li rewşa wan pirsî.
Îro şandeya Navnetewî ya ji bo Aştî û Azadiya Kurdistanê li gundê Kune Masî serdana malbata ku par di encama bombebarana balafirên dewleta Tirk de bûn qurbanî kir.
Di dema serdanê de Endama şandeyê Nîko Hugl axivî û got; “Em li virin ji bo em xema we parve bikin û ji nêz de êşa we hîs bikin û sucên dewleta Tirk bibînin. Li gorî me dewleta Tirk dewletek faşiste û bi hemû awayek qirkirina nijadî li dijî gelê Kurd dike. Dewleta Tirk bi hevkariya hin welatên din ku çekan didin Tirkiyeyê van êrişan pêktîne.”
Her wiha Nîko diyarkir dema ew vegeriyan Almanyayê wê kiryarên dewleta Tirk wek raporek pêşkêşî gelek navendên welatên Ewropî bikin.
Li ser navê malbatê jî Peyman Talib ku bi xwe di êrişê de dest û lingek xwe wendakir axivî û got; “Tenê daxwaza me ewe ku dawî li van êrişên dewleta Tirk were anîn ku bi awayek hovane êrişê ser Kurdistanê dike û em welatiyên sivîl dibin qurbanî. Her wiha em naxwazin êdî welatên Ewropî çekan bi firoşin Tirkiyeyê û Tirkiye jî bi van çekan Kurdan qetil bike.”
(kş)
