Şandeya HDP û KCD'ê vegeriya Tirkiyeyê

Şandeya HDP û KCD'ê serdana xwe ya Herêma Federê ya Kurdistanê temam kir û vegeriyan Tirkiyeyê.


Şandeya Partiya Demokratîk a Gelan (HDP) û Kongreya Civaka Demokratîk (KCD) ku ji bo li ser pirsgirêka kurd, polîtîkayên şer, pirsgirêkên herêmî û yekîtiya neteweyî hevdîtinan bike, di 7'ê îlonê de çûbû Herêma Federe ya Kurdistanê, serdana xwe temam kir û vegeriya Tirkiyeyê. Di heyetê de Hevserokê Giştî yê HDP'ê Sezaî Temellî, Hevserokê KCD'ê û Parlamenterê HDP'ê yê Agiriyê Berdan Ozturk, Serokwekîla Koma HDP'ê û Parlamentera Mersinê Fatma Kûrtûlan, Cîgirê Hevserokê Giştî Nazmî Gur, Parlamanenterê HDP'ê yê Amedê Îmam Taşçier cih girtibûn.

Şande di çarçoveya serdana xwe de bi Serokkomarê Iraqê Berhem Salih, Serokê Giştî yê Partiya Demokrata Kurdistanê (PDK) Mesût Barzanî, Serokê Herêma Federa ya Kurdistanê Nêçîrvan Barzanî, Serokwezîrê Herêma Kurdistanê Mesrûr Barzanî, û rayedarên Yekitiya Niştemaniya Kurdistanê (YNK), Yekgirtûya Îslamî ya Kurdistanê, Tevgera Azadî ,Tevgera Goran û Tevgera Nifşê Nû re hevdîtin pêk anî.

Beriya Şandeya HDP û KCD'ê şandeya Meclisa Jinan a HDP'ê ku ji Parlamentera HDP'ê ya Êlihê Feleknas Ûca, Parlamentera Şirnexê ya HDP'ê Nûran Îmîr, Parlamentera HDP'ê ya Amedê Semra Guzel, Hevşaredara Şemrexê Nalan Ozdemîr pêk dihat jî çûbû serdana Herêma Federa ya Kurdistanê bi gelek sazî û siyasetmedarên jin ên Kurdistanê re hevdîtin pêk anîbû.