Endamê Konseya Rêveber a KCK’ê Diyar Xerîb di sêyemîn salvegera şehadeta xwe de li ser gora wî ya li Binarê Qendîlê bi merasîmek girseyî hat bîranîn. Di merasîmê de soza berdewamkirina têkoşîn û rêbaza Şehîd Diyar Xerîb û hemû şehîdên tevgera rizgarîxwaz a gelê Kurd hat dayîn.
Di saetên êvarê de bi boneya sêyemîn salvegera şehadeta Endamê Konseya Rêveber a KCK’ê Diyar Xerîb, li Goristana Şehîd Mehmed Karasungur a li Binarê Qendîlê bi amadebûna malbata şehîd, rêhevalên wî û gelek welatiyên Başûrê Kurdistanê merasîmek bîranînê hate lidarxistin.
Di merasîmê de wêneyên Şehîd Diyar Xerîb û her du gerîlayên pêre şehîdbûn, Şahîn Dîcle û Dewran Canfeda hat hildan, deste gulek li ser gora şehîd Diyar Xerîb hat danîn û dirûşmên “Şehîd namirin” hatin berzkirin.
Merasîma ku bi deqeyek rêzgirtina ji bo şehîdan destpêkir, li ser navê Komîteya Malbatên Şehîdan a PKK’ê ya Başûr, Endama Komîteya Malbatên Şehîdan Sara Kerîm daxuyaniyek xwend.
Di daxuyaniyê de hat gotin, “Sê sal di ser şehadeta Diyar Xerîb û rêhevalên wî re derbas dibin, em li vir li ser gora wan a pîroz kombûne. Em soza xwe dubare dikin ku emê têkoşîna wan berdewam bikin heta bidestxistina Kurdistanek azad ku xewn û xeyala hemû şehîdaye.”
Di dewama daxuyaniyê de wiha hat gotin: “Îro gelê Kurd bi şerekî giran re rû birûye. Xaka Kurdistanê ketiye ber êrişên dewleta Tirk a dagirker û xeta xiyanetê. Êrişa li dijî gerîla, destkeft û xwîna şehîdan gihiştiye lûtkeyê. Faşîzma Tirkiye bi hemû teknîka pêşketî ya şer, li gel piştgiriya NATO û xeta xiyanetê li Başûrê Kurdistanê ji çiyan ta digihe nava gund û bajaran dest bi êrişan kiriye. Armanca van êrişan tinekirina gelê Kurd û destkeftiyên ku bi xwîna hezaran şehîd çêbûne ye.
Em ê bi rûhê berxwedana Zap, Metîna û Avaşîn li dijî dagirkerî û xeta xiyanetê têkoşînê bilindtir bikin û Kurdistanê bi parêzin.”
Piştre girse serdana gora Endamê Komîteya Malbatên Şehîdan a PKK’ê ya Başûr Şehîd Şukrî Serhed kirin. Bi dirûşmên “Şehîd namirin” dawî li merasîma bîranê hat.
(kş)
