Nivîskar û Rojnameger Şiwan Dawidî sedema tecrîda li ser Rêberê Gelê Kurd Abdullah Ocalan tirsa ji karîzma û cemawiyê ku heye dibîne û got: “Azadkirina zû ya Ocalan di qezenca proseya aştî, mafên gelan û demoksaiyê de ye. Eger Ocalan ji derve bûya wê niha pêvajoya aştiyê gavên mezin avêtibûya.”
Nivîskar û Rojnameger Şiwan Dawidî têlildarî tecrîda li ser Rêberê Gelê Kurd Abdullah Ocalan û girîngiya azadiya Rêber Ocalan de ji Rojnews’ê re axivî û azadikirina Rêber Ocalan bi pêşkeftina proseya aştî û demokrasiya gelan pênase dike û got: “Sedema tecrîdkirina Ocalan tirsa ji vê karîzma û cemawiya ku heye. Li gorî wan wê bi dîlgirtina Birêz Abdullah Ocalan şoreşa Kurd bêdeng bikin, lê ev yek hate îspatkirin ku zîndanê nekariye qet şoreşekê bêdeng bike. Ji ber ku şoreş ji bo bidestxistina mafan desthilatê li îradeya gel dike.”
Şiwan Dawidî bal kişand ser girîngiya azadiya Rêber Ocalan û wiha domand: “Azadkirina Rêber Ocalan, her roja zûtir di qezenca proseya aştî, mafên gelan û demokrasiyê de ye. Lê, mixabin ev sîstema desthilatdariyê ku li Tirkiyeyê heye, guh nade mafên mirovan, netewe û pêkhateyan.”
Nivîskar û Rojnameger Şiwan Dawidî diyar kir ku eger Rêber Ocalan ji derve ve, wê bikare ji bo aştiyê gavên mezin bavêje û wiha dawî kir: “Eger ji derve bûya niha proseya aştiyê gavên gelek mezin avêtî. Azadnekirina Ocalan wê rewşa Kurd û Tirkiyeyê xerabtir bike. Niha rewşa aboriya wê ketiye û rewşa siyasî nearame. Lewma berbi rûxanê diçe.”
(ab)
